پارێزگار و سەرۆکێ جڤاتا پارێزگەها کەرکووکێ مژوولی چنە؟
د دەمەکی دە کو رۆژانە گەلێ کورد ل کەرکووکێ راستی تەعریب و دەست بسەرداگرتنا خانی و زەڤیێن خوە یێن چاندنیێ تێن ژ ئالیێ حەشدا شەعبی و سوپایێ ئیراقێ ڤە، پارێزگارێ کەرکووکێ کو قاشۆ ژ بەشا کوردانە و ب لهەڤهاتنەکە نەزەلال یا یەنەکێ ب لایەنێن دن یێن سیاسی یێن عەرەب و ترکومان رە بوویە پارێزگار، ل شوونا چارەسەریەکێ بۆ رەوشا کوردان ل کەرکووکێ ببینە مژوولی بازرگانی و گەندەلیێ یە.
چاڤکانیێن پێگەها دارکا مازی ئەشکەرە کرن، هەری داوی پارێزگارێ کەرکووکێ و سەرۆکێ ئەنجوومەنا پارێزگەها کەرکووکێ ب ئاوایەکی نەیاسایی دو پرۆژەیێن گرینگ یێن ئاڤێ ب بوهایێن هەری بلند ل کەرکووکێ ژ خوە رە مسۆگەر کرنە.
چاڤکانیێن پێگەها دارکا مازی تەکەز کرن، هۆبەیا گرێبەستان یا سەر ب بەشا گرێبەستێن حکوومی یێن پارێزگەها کەرکووکێ، نڤیسارەک ب هەژمارا “24933 ل رۆژا 26/10/2025” ب ئیمزەیا رێبوار تاها پارێزگارێ کەرکووکێ و ب ناڤونیشانێن “ڤەخواندنا راستەراست” ژ کۆمپانیێن “ئەل-مەشارق و شمس ئەل-مەهام” یێن گرێدایی بازرگانی و بەلێندەرییا گشتی رە شاندیە و تێ دە داخواز ژ ڤان دو کۆمپانیان کریە کو پرۆژەیێن دروستکرنا ئاڤا پەنجا عەلی یا ب قەبارەیێ “1000 م3” د دەمژمێرەکێ دە، لگەل دانینا بۆریا ئاڤێ یا پرۆژەیا ئاڤا باژارۆکێ تازە د چارچووڤەیا پلانا پترۆ دۆلار دە بۆ سالا 2024 ئەنجام بدن.
چاڤکانیێن دارکا مازی هەر وەها ئەشکەرە کرن، ئەڤ دو پرۆژە ب بوهایێ 21.907.551.000 بیست و یەک ملیار و نەهسەدو حەفت ملیۆن و پێنجسەدو پێنجی و یەک هەزار دیناران وێ وەرن جیبجیکرن.
ل گۆر ئاگاهیێن رووپەلا دارکا مازی، بەلێندەرێ عەرەب یێ ب ناڤێ “ئەحمەد جاسم جەعفەر ئەل-حەمدانی” خوەدیێ هەردو کۆمپانیێن ئەل-مەشارق و شمس ئەل-مەهامە، ناڤهاتی گەنجە و کارێن بازرگانی یێن قاسم حافز ئالیکارێ پارێزگارێ کەرکووکێ بۆ کاروبارێن هونەری و برایێ محەمەد ئە-حافز سەرۆکێ ئەنجوومەنا پارێزگەها کەرکووکێ یە، ئەڤ کەس هەر وەها ژ مهەیمەن حەمدانی کاندیدێ دەرچوویی یێ پارتیا “تەقەدم” ل پارێزگەها کەرکووکێ نێزیکە.
