سەرۆک بارزانی: سەبر ژی خوەدی سینۆرە

پەیامەک ژ سەرۆک بارزانی بۆ رایا گشتی:

ب ناڤێ خوەدێیێ دلۆڤان

د درێژاھیا دیرۆکێ دە گەلێ کوردستانێ تو جاری لگەل شەر دە نەبوویە و ھەر تم داخوازکارێ ئاشتی و پێکڤەژیانێ بوویە. ھەگەر شەر ژی ب سەر دە ھاتبە سەپاندن، ئەوی بەرەڤانی د مافێن خوە دە کریە. ئەڤ بنگەھەکی نەگوھەرە و ژ باوەریەکە قاھیم و فەرھەنگەکە دەولەمەندا ئاشتیخوازی و پێکڤەژیانا گەلێ کوردستانێ چاڤکانیێ دگرە.

جھێ داخەکە مەزنە کو نھا شەر و گرژیەکا زێدە د ناڤچەیا مە دە ھەیە. نھا و بەرێ ژی، ھەر دەم ھێڤیا مە ئەو بوویە کو ھەر چ گرفت و کێشە ھەنە ب رێیێن ئاشتیانە وەرن چارەسەرکرن، ژ بەر کو ھەر تم شەر دبە سەدەما کاڤلکاری و مالوێرانیێ.

د ڤێ ناڤبەرێ دە، جھێ ماتمایینەکە مەزنە کو ھنەک گرووپ و ئالی د بن ناڤێ “موقاوەمە” و ب ھنجەت و درووشمێن بێبنگەھ، رێ ددن خوە کو ئێرشی جھێن سڤیل، ژێرخانەیا ئابۆرییا ھەرێما کوردستانێ و بنکەیێن پێشمەرگە بکن. ئەڤ شەرفرۆشتن و دەستدرێژیەکە ئاشکەرەیە بۆ سەر مافێن ھەڤوەلاتیان و ئارامی و ئاساییشا ھەرێما کوردستانێ.

ل ڤر دڤێ ھەر کەس باش بزانبە کو سەبر ژی خوەدی سینۆرە. پێشمەرگە تو جاری زلم و زۆرا تو ئالیەکی قەبوول نەکریە؛ نابە و ناخوازە کو ئەڤ شەرفرۆتن و تێکدانا ئارامیا ھەرێما کوردستانێ و ئەولەھیا ھەموەلاتیان ژ ئالیێ ڤان گرووپان ڤە بەردەوام بکە. ژ بۆ ڤێ مەبەستێ، ئەم بانگ ل حکوومەت و ئەنجومەنا نوونەران یا ئیراقێ و ئالیێن سیاسی، ب تایبەتی چارچۆڤەیا ھەڤاھەنگیێ دکن کو ب جدی بکەڤن سەر خەتێ و سینۆرەکی ژ بۆ ڤان دەستدرێژیان دەینن، ژ بەر کو بەردەوامبوونا ڤێ شەرفرۆتنێ دێ ببە سەدەما ئەنجامێن خەراب.

ژ بلی نیشاندانا ھەڤسۆزیا خوە بۆ مالبات و کەسووکارێن وان ئەزیزێن کو د ئەنجاما ڤان ئێریشێن نەحەق دە شەھید بوونە، ئەم خەلکێ هێژایێ کوردستانێ ژی پشتراست دکن کو ئەم دێ ب ھەموو شیانا خوە بەردەوام بن دا کو کوردستان ژ شەر و بەلایان دوور بە و ئارامی، ئاساییش و ژیانا خەلکێ پاراستی بە. سەرکەفتن ھەر بۆ گەلێ کوردستانێیە.

مەسعوود بارزانی

8ی سوباتا 2026ێ