ب درۆنان ئێریشی گوندەکی سلێمانیێ ھات کرن: قوربانی ھەنە

رێزە ئێریشێن درۆنی ل سەر گوندێ زرگوێزەلەیێ ل پارێزگەھا سلێمانیێ ھاتن کرن و د ئەنجامێ دە چەند کەس بوون قوربانی.

ل گۆر ئاگاهیان، دەمژمێر 7:30ێ سبەھا ئیرۆ 11ێ ئادارێ، ب درۆنان ئێریش ل سەر گوندێ زرگوێزەلەیێ ل دەڤەرا زرگوێزەلا پارێزگەھا سلێمانیێ ھات کرن.

ئاگاهی ددن خویاکرن، د ئەنجاما ڤان ئێریشان دە کەسەکی ژیانا خوە ژ دەست دایە و دو کەسێن دن ژی بریندار بوونە.

ھەر وھا هات زانین ژی، ھندەک درۆنان ناڤەندا گوند و ھندەکان ژی چیایێن دەردۆرێ ئارمانج گرتنە؛ ژ بەر ڤێ یەکێ زیانەکا مەزن یا مادی گھیشتیە مال و ملکێن وەلاتیان. ئەڤ گوند د ناڤا چەند رۆژێن بۆری دە ژی چەند جاران ھاتبوو بۆمبەباران کرن.

ژ دەستپێکا شەرێ ئیسرایل و ئامەریکایێ یێ ل دژی ئیرانێ ڤە؛ گرووپێن چەکدار رۆژانە ب درۆن و مووشەکان ھەرێمێن جودایێن ھەرێما کوردستانێ دکن ئارمانج، کو د ئەنجامێ دە ھەژمارەکا مەزن یا سڤیلان و ئەندامێن ھێزێن ئەولەھیێ بوونە قوربانی.

دەستھلاتدارێن ھەرێما کوردستانێ چەند جاران داخواز ژ حکوومەتا ئیراقێ کرنە کو سەروەریا وەلات بپارێزە، سینۆرەکی ژ بۆ ئێریشان دەینە و تاوانباران بگرە، لێ بەلێ ھەتا نھا بەرپرسێن بەغدایێ ت گاڤەکە پراکتیکی ژ بۆ راوەستاندنا ڤان ئێریشان نەئاڤێتنە.