کۆنسولێ ئیرانێ ل هەولێرێ: خیانەتا ناڤدەولەتی ل مە هاتیە کرن
کۆنسولێ گشتییێ ئیرانێ ل هەولێرێ فەرامەرز ئەسەدی راگهاند، شەر ل سەر وەلاتێ وی هاتیە فەرزکرن و گۆت کو د دەما دانوستاندنێن ل جنێڤێ دە “خیانەتەکە ناڤدەولەتی” ل وان هاتیە کرن.
کۆنسولێ گشتییێ کۆمارا ئیسلامی یا ئیرانێ ل هەولێرێ فەرامەرز ئەسەدی ئیرۆ 12ێ ئادارێ د کۆنفەرانسەکە رۆژنامەڤانیێ دە دیار کر، د دەما گەرا داوی یا دانوستاندنێن د ناڤبەرا تەهران و واشنگتۆنێ دە کو ل باژارێ جنێڤێ برێڤە دچوو، “خیانەتا ناڤدەولەتی” ل وان هاتیە کرن و هەموو هێلێن سۆرێن دیپلۆماتیک هاتنە بنپێکرن.
ئەسەدی تەکەز کر، شاندەیا ئیرانێ ل سەر داخوازا وەلاتێن ناڤچەیێ جارەکە دن دەست ب گوفتوگۆیێن ل گەل ئامەریکایێ کربوو. هەروها دەستنیشان کر کو هەر چەند باوەریا وان ب رایەدارێن واشنگتۆنێ تونە بوو ژی، وان دەرفەت دابوو دیپلۆماسیێ و گۆت: “د درێژاهیا دیرۆکێ دە ئامەریکا د دانوستاندنان دە ت دەمێ راستگۆ نەبوویە.”
کۆنسولێ ئیرانێ دەستنیشان کر، وەلاتێ وی ناخوازە شەر بکە، لێ ئەو نەچار مانە کو بەرەڤانیێ ل خوە بکن. هەروهها گۆت: “پێشی ئیسرائیل و ئامەریکایێ ئێریشی وەلاتێ مە کرن و شەر ل سەر مە فەرز کرن. شەر و دانوستاندن ت دەمێ ب هەڤ رە نابن. ئەڤ شەرێ ل دژی ئیرانێ،نە تەنێ ل دژی مەیە، لێ بەلێ ل دژی دیپلۆماسیا ناڤدەولەتییە.”
فەرامەرز ئەسەدی د داخویانیا خوە دە بال کشاند سەر زیانێن سڤیل و گۆت کو د رۆژا یەکەم یا شەر دە، ئامەریکا و ئیسرائیلێ دبستانەک بۆمبەباران کریە. ل گۆری گۆتنێن وی، د ئەنجاما وێ بۆمبەبارانێ دە زێدەتری 100 خوەندەکارێن زارۆک هاتنە کوشتن. ئەسەدی گۆت ژی، ئەڤ بوویەر ل سەر ئاستا جیهانێ و هەتا ل ناڤخوەیا ئامەریکایێ ژی بوویە سەدەما نەرازیبوونێن مەزن.
