وەزارەتا پێشمەرگە: ل ھەولێر و سلێمانیێ ب درۆنان ئێریش ل دو بارەگەھێن مە ھات کرن
وەزارەتا پێشمەرگەیا حکوومەتا ھەرێما کوردستانێ راگھاند، بارەگەھێن وان ل ھەولێر و سلێمانیێ بوونە ئارمانجا ئێریشێن درۆنی و د ئەنجامێ دە 3 پێشمەرگە بریندار بوونە. وەزارەتێ بانگ ل بەغدایێ کر کو سینۆرەکی ژ بۆ ڤان ئێریشان دەینە.
وەزارەتا پێشمەرگە د داخویانیەکێ دە ئاشکەرە کر، ئیرۆ 18ێ ئادارێ دو بارەگەھێن یەکەیێن سەر ب وەزارەتا پێشمەرگە ڤە ل ھەر دو پارێزگەھێن ھەولێر و سلێمانیێ بوونە ئارمانجا ئێریشێن درۆنی و د ئەنجامێ دە سێ پێشمەرگە بریندار بوونە.
د داخویانیێن دە ھات دیارکرن: “ئەڤ دەستدرێژیا نەبەرپرسیارانە د دەمەکێ دەیە کو بەرێ ژی چەندین جاران بارەگەھێن ھێزا پێشمەرگە راستی بۆمبەبارانان ھاتنە.” وەزارەتێ ھەروھا دەستنیشان کر، دەربارێ ڤان بنپێکرنان دە وان فەرماندارێ گشتی یێ ھێزێن چەکدارێن ئیراقێ محەمەد شییاع سوودانی و فەرمانداریا ئۆپەراسیۆنێن ھەڤبەش ئاگاھدار کرنە.
وەزارەتا پێشمەرگە د بەشەکە دن یا داخویانیا خوە دە ب توندی ئەڤ ئێریش شەرمەزار کرن و داخواز ژ سەرۆکوەزیرێ ئیراقێ محەمەد شیاع سوودانی کر کو وەکی فەرماندارێ گشتی یێ ھێزێن چەکدار ب ئەرکا خوەیا یاسایی رابە و سینۆرەکی ژ بۆ ڤان دەستدرێژیێن ناڤخوەیی دەینە.
د داویا داخویانیێ دە وەزارەتێ تەکەز کر، دڤێت پێنگاڤێن بلەز و وەرن ئاڤێتن ژ بۆ رێگرتنا ل وان “گرووپێن ژ دەرڤەیی یاسایێ” دا کو رێ ل بەر دووبارەبوونا ڤان کریاران وەرە گرتن، کو ئەڤ جورە ئێریش دبن گەفەکە جدی ل سەر ئاساییشا تەڤاھیا ناڤچەیێ.
