ئارتێشا پاسداران کوشتنا وەزیرێ ئیتیلاعاتێ یێ ئیرانێ پشتراست کر

ئارتێشا پاسداران یا ئیرانێ ب رەنگەکی فەرمی کوشتنا وەزیرێ ئیتیلاعاتێ یێ ئیرانێ راگھاند.

ئارتێشا پاسداران یا ئیرانێ ئیرۆ رۆژا چارشەمب، 18ێ ئادارا 2026ێ، ب رەنگەکی فەرمی پشتراست کر کو، وەزیرێ ئیتیلاعاتێ یێ ئیرانێ ئیسماعیل خەتیب ھاتیە کوشتن.

ئەڤ ژی د دەمەکێ دەیە کو، وەزیرێ بەرەڤانیێ یێ ئیسرایلێ ئیسرائیل کاتز سبەھا ئیرۆ چارشەمبێ راگھاندبوو کو، وەزیرێ ئیتیلاعاتێ یێ ئیرانێ ئیسماعیل خەتیب د ئێریشێن وانێن شەڤێدی یێن ل سەر تەھرانێ دە ھاتیە کوشتن.

وەزیرێ بەرەڤانیێ یێ ئیسرایلێ تەکەز ژی کر کو، ئارتێشێ دەستوور وەڕگرتیە کو ھەر گاڤا بەرپرسەکی پایەبلندێ ئیرانی بکەڤە بەر چاڤێن وێ بکوژە. ھەروەسا راگھاند کو، ئیسرایل د لووتکەیا قۆناغەکە چارەنڤیسساز دەیە.

وەزیرێ بەرەڤانیێ یێ ئیسرایلێ ئیرۆ رۆژا چارشەم، 18ێ ئادارا 2026ێ، کوشتنا سەکرەتەرێ ئەنجوومەنا بلندا ئەولەکاریا نەتەوەیی یا ئیرانێ عەلی لاریجانی و ھەژمارەکا فەرماندارێن پایەبلندێن لەشکەری یێن ئیرانێ راگھاند.

ئەڤ ژی د دەمەکێ دەیە کو، ئیسرایل و ئامەریکایێ ل سەرێ سبەھا رۆژا شەمیێ، 28ێ سباتا 2026ێ، ب ھەڤ رە ئێریشی ئیرانێ کر و گەلەک باژارێن وی وەلاتی بۆمبەباران کرن، و د ئەنجامێ دە رێبەرێ بلندێ کۆمارا ئیسلامی یا ئیرانێ عەلی خامنەیی و گەلەک سەرکردەیێن بلندێن ئیرانێ ھاتن کوشتن.

د بەرسڤا وێ ئێریشێ دە، ئیرانێ ژی ئێریشی وەلاتێ ئیسرایلێ و جھ و بنگەھێن ئامەریکایێ ل چەند وەلاتێن دەڤەرێ کر و ھەتا نھا ژی ئێریشێن ھەر دو ئالیان بەردەوامن و ھەژمارا کوشتی و برینداران و زرارێن مادی بەر ب زێدەبوونێ ڤەیە.

ھەرێما کوردستانێ ژی، و ب تایبەتی ژی باژارێ ھەولێرێ، د ڤێ چارچۆڤەیێ دە چەند جاران کەفتیە بەر ئێریشێن ب مووشەک و درۆنان، لێ پرانیا ئێریشێن ئاسمانی یێن ئیرانێ ژ ئالیێ سیستەما بەرەڤانیا ئاسمانی ڤە ل ھەرێما کوردستانێ ھاتنە شکاندن.