عەفرین.. وەلاتیەکی کورد ژ بەر ئێریشێن نژادپەرەست جانێ خوە ژدەست دا
وەلاتیەکی کوردێ عەفرینێ دەما کو ژ پیرۆزباھیێن نەورۆزێ ڤەدگەریا، راستی ئێریشێن نژادپەرەستێن کۆمێن چەکدار ھات و د ئەنجامێ دە ژیانا خوە ژدەست دا.
رێخستنا مافێن مرۆڤان یا عەفرینێ د داخویانیەکێ دە راگھاند، وەلاتیێ ب ناڤێ لوقمان کەمال کووسا، کو ژ گوندێ بافلوونێ یێ ناڤچەیا شەرایا حەفرینێیە، رۆژا 23یێ ئادارا 2026ێ د ئەنجاما ئێریشێن ھۆڤ دە شەھید بوویە.
ل گۆری داخویانیێ، لوقمان کەمال کووسا دەما کو ژ پیرۆزباھیێن نەورۆزێ بەر ب باژارێ حەلەبێ ڤە دچوو، ل نێزی عەزازێ ژ ئالیێ کۆمەکا جوانێن عەزازی ڤە ھات سەکناندن. ڤێ کۆمێ بێیی هیچ سەدەمەکێ ب توندی لێ دا و ئەو بریندار کر.
پشتی ڤێ ئێریشێ، گاڤا کووسا گھیشت نێزی گوندێ ماریامینێ، جارەکا دن راستی ئێریشا کۆمەکا دن ھات. ژ بەر کو ھەژمارا ئێریشکاران زێدە بوو، کووسا نەکاری خوە بپارێزە و ب گرانی بریندار بوو.
رێخستنا مافێن مرۆڤان دیار کر، لوقمان کەمال کووسا ژ بەر لێدانا گران، سڤکاتی و زەختا دەروونی یا مەزن (قەھرێ)، تووشی کریزا دل (جەلتە) بوو و ژیانا خوە ژ دەست دا.
رێخستنێ دەستنیشان کر کو ئەڤ بوویەر نە راستھاتن بوو، لێ ئەنجاما نژادپەرەستیەکا پلانکرییە کو ئارمانجا وێ “شکاندنا ڤینا کوردان و تێکدانا شاھیا نەورۆزێیە.”
د داخویانیێ دە ھات گۆتن ژی، ھێزێن ئەولەھیێ یێن ل ھەرێمێ بەرپرسیارێن راستەراستن کو رێ ددن ڤان تاوانباران کو ئێریشی سڤیلان بکن.
د داویا داخویانیێ دە، رێخستنا مافێن مرۆڤان یا عەفرینێ بال کشاند سەر “دەستێن دەرڤە” و ھشیاری دا کو ئەڤ جورە کریار خزمەتا فتنە و دوبەرەکیا د ناڤبەرا پێکھاتەیێن سووریەیێ دە دکن.
