وەزارەتا پێشمەرگە: د ئێریشا ئیرۆ یا ئیرانێ ده 6 پێشمەرگە شەهید بوون و 30 بریندار بوون
وەزارەتا پێشمەرگە دبێژە، سپێدههییا ئیرۆ ئیرانێ ب شەش مۆشەکان ئێریشی سەر هێزێن پێشمهرگه كرییه و د ئەنجامێ دە 6 پێشمەرگە شەهید بوون و 30 پێشمەرگەیێن دن ژی بریندار بوون.
داخویانیا وەزارەتا پێشمەرگە ووسایه:
سپێدههییا ئیرۆ 24/3/2026 د دو ئێریشێن جودا دە، بارەگەهەکێ فیرقەیا 7 یا پەیادە ل دەڤەرا 1 و هێزەکە فیرقەیا 5 یا پەیادە یا هێزێن پێشمەرگە ل سینۆرێ سۆرانێ، د چالاکیەکە دژمنانە دە و ب غەدر و خیانەت و دوور ژ هەموو رەوشتێن مرۆڤاهی و جیرانتیێ، بوون ئارمانجا ئێریشا 6 مۆشەکێن بالیستی یێن ئیرانی. د ئەنجامێ دە 6 پێشمەرگەیێن قاهرەمان شەهید بوون و 30 پێشمەرگەیێن دن ژی بریندار بوون.
د دەمەکێ دە کو ب توندترین شێوە ڤێ ئێریشێ و هەموو ئێریشێن دن یێن تەرۆریستی یێن ل سەر هەرێما کوردستانێ شەرمەزار دکن، ئەم دووپات دکن کو مافێ مەیێ تام هەیە ژ بۆ بەرسڤدانا هەر دەستدرێژیەکە کو ل سەر گەل و ئاخا مە بێ کرن.
ب هیچ رەنگی مە چاڤەرێ نەدکر کو ب ڤی ئاوایێ نامهردانە، بەرسڤا هەلوەستا ئاشتیانە یا هەرێما کوردستانێ بێ دان. لێ بەلێ تەمەنێ غەدر و ستەمێ کورتە و ئیرادەیا ئاشتیێ دێ سەربکەڤە.
لگەل سەرساخی و هەڤخەمیا مە بۆ مالبات و کەسوکارێن شەهیدێن مە، ئەم هێڤیا باشبوونا بلەز بۆ بریندارێن مە دخوازن. جارەکە دن داخوازێ ژ هەموو ئالیان دکن کو شەر و ئالۆزی ژ هەرێما کوردستانێ دوور بخن، و داخوازێ ژ حکوومەتا فهدەرال، جڤاکا ناڤدەولەتی و هەموو دۆستێن خوە دکن کو ل هەمبەر ڤان بنپێکرنان بێدەنگ نەمینن و سینۆرەک ژ بۆ ڤێ دەستدرێژیا بێباک بێ دانین.
