نێچیرڤان بارزانی: ئێریشا ئیرانێ ل سهر هێزێن پێشمهرگه دژمنكارییهكا راستهراسته
نێچیرڤان بارزانی، سەرۆکێ هەرێما کوردستانێ د پەیامەکێ دە دەربارێ شەهیدبوونا شەش پێشمەرگەیان دبێژە: “ئەڤ ئێریش، دەستدرێژیەکە دژمنانە یا راستەراستە بۆ سەر سەروەریا وەلات و چ هنجەتان هلناگرە و ب تەمامی ل دژی بنگەهێن جیرانتیا باشە.”
دەقا پەیاما نێچیرڤان بارزانی:
ب توندی سەرکۆنەیا وێ ئێریشا مۆشەکی یا ئیرانێ دکین کو بەرێ سپێدههییا ئیرۆ بارەگەهێن هێزا پێشمەرگە ل سینۆرێ سۆران کرن ئارمانج و د ئەنجامێ دە هەژمارەک پێشمەرگەیێن قەهرەمان شەهید و بریندار بوون.
پرسە و سەرساخیێن خوەیێن کوور ئاراستەیی مالبات و کەسووکارێن سەربلندێن شەهیدان دکین و هەڤپارێن خەما وانن، هێڤیا چاکبوونا بلەز ژی بۆ برینداران دخوازین.
هەرێما کوردستانێ هەر دەم فاکتەرێ ئارامی و سەقامگریێ بوویە. ئەم پابەندن ب سیاسەتا تێنەکەتن و دوورکەتنا ژ هەڤرکیان، ب چ رەنگی ژی گەف نینین بۆ سەر ئەولەهیا وەلاتێن جیران. لۆما ئەڤ ئێریش، دەستدرێژیەکە دژمنانە یا راستەراستە بۆ سەر سەروەریا وەلات و چ هنجەتان هلناگرە و ب تەمامی ل دژی بنگەهێن جیرانتیا باشە.
داخوازێ ژ حکوومەتا فیدەرالا ئیراقێ و جڤاکا ناڤنەتەوەیی دکین هەولێن خوە چرتر بکن بۆ رێگرتن ل دوبارەبوونا ڤان دەستدرێژیان و پاراستنا سەروەریا ئاخا ئیراق و هەرێما کوردستانێ.
