Skip to content
پەیامەک ژ سەرۆک بارزانی
سەرۆک بارزانی ئێریشا مووشەکی یا ئیرانێ یا ل سەر بارەگاھێن ھێزێن پێشمەرگە شەرمەزار دکە و رادگھینە کو ئەڤ ئێریشەکە دژمنانەیە و تو ھنجەتان قەبوول ناکە. ھەر وھا ئاماژە ب وێ یەکێ کر کو ئەڤ ئێریش د دەمەکێ دە نە کو ھەرێما کوردستانێ نەبوویە پارچەیەک ژ ڤێ شەرێ نھا و تو جاری نەبوویە گەف ل سەر جیرانێن خوە.
سەرۆک بارزانی داخویانیەک بەلاڤ کر و تێ دە دیار کر: “ئەز ب توندی وێ ئێریشا کو بەرێ سبێیا ئیرۆ سێشەمێ، 24ێ ئادارا 2026، ب مووشەکێن ئیرانی ل سەر بارەگاھێن ھێزێن پێشمەرگەیێن کوردستانێ ھاتی کرن، شەرمەزار دکم.”
سەرۆک بارزانی ھەر وھا دبێژە: “ب داخەکە مەزن، د ئەنجامێ دە ھەژمارەک پێشمەرگەیێن قەھرەمان شەھید بوون و ھەژمارەکە دن ژی بریندار بوون. ئەز سەرساخیێ ژ مالباتێن شەھیدێن ڤێ ئێریشا نەھەق رە دخوازم و خوە ب ھەڤپارێ خەما وان دزانم؛ ھێڤیا باشبوونا بلەز ژی ژ بۆ برینداران دخوازم.”
د پەیاما سەرۆک بارزانی دە هەر وەها هاتیە: “ئەو ئێریشەکە دژمنانەیە و تو ھنجەتان ھلناگرە.” ھەر وھا دەستنیشان کر کو ئەڤ چەند جارن ئێریشێن ب ڤی رەنگی، بێیی بەرچاڤگرتنا بنگەھێن جیرانتیێ و یاسایێن ناڤدەولەتی، ل دژی ھەرێما کوردستانێ تێن ئەنجامدان.
سەرۆک بارزانی تەکەز کر کو ئەڤ د دەمەکێ دەیە کو ھەرێما کوردستانێ نەبوویە پارچەیەک ژ ڤی شەرێ کو نھا ل ھەرێمێ ھەیە و تو جاری نەبوویە گەف ژ بۆ جیرانان.
د داویێ دە دبێژە: “پێشمەرگە ئەزیزترین و بھادارترین سەرمایەیا گەلێ مەیە.”
