وەزارەتا پێشمەرگە رێکارێن نوو بۆ پاراستنا ئەولەھیا سەنگەران وەشاندن
رێڤەبەریا گشتی یا راگھاندن و ھشیاریا نەتەوەیی یا وەزارەتا پێشمەرگە، ب ئارمانجا پاراستنا ئەولەھیا زانیاران و روومەتا لەشکەری یا ھێزان، ھەژمارەکا رێنما و بریارێن نوو ژ بۆ ھەمی ئەفسەر و پێشمەرگەیان دەرخستیە.
رێڤەبەریا گشتی یا راگھاندن و ھشیاریا نەتەوەیی یا وەزارەتا پێشمەرگە ئیرۆ رۆژا سێشەمب، 24ێ ئادارا 2026ێ، د داخویانیەکێ دە تەکەز کر کو، دەربازکرنا مەدیایێ ژ بۆ ناڤ بنگەھێن لەشکەری و کشاندنا وێنەیێن سەنگەران و وەشاندنا وان ل سەر تۆرێن جڤاکی ب ھەر ئاوایی قەدەغەیە.
رێڤەبەریا ناڤبری تەکەز ژی کر کو، دانا ھەر زانیار و داخویانیەکێ ب دەزگەھێن مەدیایێ ژ ئالیێ ئەفسەر و پێشمەرگەیان ڤە قەدەغەیە و کەسێن کو بنپێکرنان دکن دێ رووبروویی سزایێن ھەری توندێن لەشکەری و ئیداری ببن.
وێ برێڤەبریێ ھەروەسا بانگ ل وەلاتیان ژی کر کو، ھەر رووپەل و حەسابەکە کو زانیارێن نھێنی ب ناڤێ پێشمەرگەیان بەلاڤ دکە، لینکا وێ ژ وان رە بشینن دا کو ل دژی وان رێکارێن قانوونی بێن وەرگرتن.
ل گۆری وێ داخویانیێ، دڤێت ئەفسەرێن راگھاندن و ھشیاریێ ل یەکینەیێن لەشکەری، ئۆپەراسیۆنان و ھەوالگریێ ھەمی تەڤگەرێن پێشمەرگە و ئەفسەران ب تەمامی بشۆپینن و ھەروەسا ڤان رێنمایان ژی بەلاڤ بکن.
رێڤەبەریا گشتی یا راگھاندن و ھشیاریا نەتەوەیی ھەروەسا گۆت: ئەم دێ ب ھەڤاھەنگیا جھێن د سەر خوە دە مەدیایا جڤاکی بشۆپینن، ژ بۆ ھەر بنپێکرنەکێ و وەرگرتنا رێکارێن لەشکەری و قانوونی.
