فیدان: ئامەریکا و ئیسرایل ناڤچەیێ بەر ب شەرەکی بەرفرەھ ڤە دبن
وەزیرێ دەرڤەیێ ترکیەیێ ھاکان فیدان، دەربارێ ئالۆزیێن ل رۆژھلاتا ناڤین و پۆلیتیکایێن ئامەریکا و ئیسرایلێ دە ھشیاریێن توند دان. فیدان دیار کر کو شەرێ ل دژی ئیرانێ بنپێکرنا یاسایێن ناڤدەولەتییە و دەستنیشان کر کو ئارمانجا ئیسرایلێ ئەوە کو وەلاتێن ئیسلامی بخە ناڤ پەڤچوونەکە دەمدرێژ.
وەزیرێ دەرڤە یێ ترکیەیێ ھاکان فیدان، ئیرۆ 28ێ ئادارێ د ھەڤپەیڤینەکە تایبەتا تەلەڤیزیۆنی دە رۆژەڤا ھەرێمی و ناڤدەولەتی نرخاند. فیدان بال کشاند سەر مەترسیا بەلاڤبوونا شەر ل سەرانسەرێ ناڤچەیێ و راگھاند کو ترکیە ژ بۆ رێگرتنا ل بەر ڤێ فەلاکەتێ د ناڤ تەڤگەرەکە دیپلۆماتیکا چالاک دەیە.
“شەر ب ئاوایەکی نەیاسایی دەست پێ کریە”
فیدان د داخویانیا خوە دە تەکەز کر کو راوەستاندنا شەری ژ بۆ وان د سەر ھەر تشتی رەیە و وھا گۆت:
“ئارمانجا مەیا پێشین راوەستاندنا شەرە. د ھەمان دەمێ دە ژ بۆ مە پر گرینگە کو ئەم رێ ل بەر فرەھبوونا ڤی شەری بگرن. ئەڤ شەر ب ئاوایەکی نەیاسایی دەست پێ کریە و ھەر رۆژ مەترسیا مەزنبوونا وێ زێدەتر دبە.”
رۆلا پاکستانێ د ناڤبەینکاریێ دە
یەک ژ خالێن ھەری بالکێشێن داخویانیا فیدان، ئەشکەرە کرنا کانالا دیپلۆماتیکا د ناڤبەرا ئالیان دە بوو. فیدان راگھاند کو پێڤاژۆیا دانووستاندنان گھیشتیە قۆناغەکە دیار و گۆت: “وسا خویا دکە کو د دانووستاندنان دە گاڤەک ھاتیە ئاڤێتن. ب کێمی ڤە گوفتووگۆ دەست پێ کرنە و ب رێیا وەلاتێ پاکستانێ پەیام د ناڤبەرا ئالیان دە تێن گوھەرتن.”
“سەناریۆیا ئیسرایلێ و تۆڤا فتنەیێ”
وەزیرێ دەرڤەیێ ترکیەیێ ھشیاری دا کو ناڤچە بەر ب لیستکەکە خەتەرناک ڤە تێ برن کو سەناریۆیا وێ ژ ئالیێ ئیسرایلێ ڤە ھاتیە نڤیساندن. فیدان ستراتەژیا ئیسرایلێ وھا شرۆڤە کر:
پەڤچوونا ناڤخوەیی یا ئیسلامی: “ئیسرایل دخوازە وەلاتێن ئیسلامی بخە ناڤ پەڤچوونەکە دەمدرێژا ب ھەڤ رە. چاندنا تۆڤا فتنەیێ وسا دکە کو کۆمبوونا جارەکە دن یا مسلمانان پر زەحمەت ببە.”
باندۆرا ل سەر ئامەریکایێ: فیدان رەخنە ل باندۆرا ئیسرایلێ یا ل سەر سیاسەتا واشنگتۆنێ گرت و دیار کر کو ئەڤ نە تەنێ “تەئۆریا کۆمپلۆیێ”یە، لێ بابەتەکی جدییە کو رۆناکبیرێن جیھانێ ژی بەحسا وێ دکن.
بانگا ل ئامەریکایێ: زەختێ ل ئیسرایلێ بکن
فیدان بال کشاند سەر باندۆرێن خرابێن ڤی شەری ل سەر وەلاتێن کەنداڤێ و بانگ ل رێڤەبەریا ئامەریکایێ کر. فیدان دیار کر کو ھەکە ب ئیرانێ رە پەیمانەک پێک ھات، دڤێت واشنگتۆن زەختەکا راستین ل سەر ئیسرایلێ بکە دا کو شەر ب داوی ببە.
د داویا ئاخافتنا خوە دە، فیدان تەکەز کر کو کارێ ھەری پێشینێ ترکیەیێ پاراستنا ھەرێمێ و دوورخستنا وەلاتێ خوە ژ ئاگرێ ڤێ پەڤچوونێیە.
