ل بانەیێ وەلاتیەکی کورد ھات بنچاڤکرن

د بەردەوامیا پێلا گرتن و بنچاڤکرنان ل باژارێن کوردستانێ دە، وەلاتیەکی کوردێ ب ناڤێ دیاکۆ ئەیازی ژ ئالیێ ھێزێن ئەولەھیێ یێن کۆمارا ئیسلامییا ئیرانێ ڤە ھات گرتن.

ل گۆری نووچەیا کو رێخستنا مافێن مرۆڤان یا ھانا بەلاڤ کریە، بوویەر شەڤا ئینێ، 27ێ ئادارێ، قەومیە. ھێزێن ئەولەھیێ ژ بۆ گرتنا ڤی وەلاتی رێبازەکە بالکێش و خاپینۆک ب کار ئانینە، ل گۆر ئاگاهیان، ھێزێن ئەولەھیێ ب وەساییتا ئیدارەیا گازێ چوونە بەر مالا وی.

ئەندامێن تیما گرتنێ جلووبەرگێن فەرمی یێن کارکەرێن گازێ ل خوە کرنە دا کو بالێ نەکشینن و ب ھێسانی دەرباسی ھوندرێ مالێ ببن.

چارەنڤیسا وی نایێ زانین

ھەتا دەما ئامادەکرنا ڤێ نووچەیێ، دەربارێ سەدەما گرتنێ، تاوانێن ل سەر وی و جھێ کو لێ تێ گرتن دە تو ئاگاھیێن فەرمی نەھاتنە بدەستخستن. مالباتا دیاکۆ ئەیازی ژ بەر بێ ئاگاھیێ د ناڤا فکارێن مەزن دە نە.

ئەڤ بنچاڤکرن د دەمەکێ دەیە کو د رۆژێن دەستپێکا سالا نوو دە، زەختێن ئەولەھیێ ل سەر باژارێن رۆژھلاتێ کوردستانێ زێدەتر بوونە.