نووری مالکی: ئارمانجکرنا مالێن سەرکردەیێن هەرێما کوردستانێ بنپێکرنا ئاساییشا ئیراقێیە
سەرۆکێ ھەڤپەیمانیا دەولەتا قانوونێ، نووری مالکی، ئێریشێن داوی یێن ل سەر مالێن سەرکردەیێن ھەرێما کوردستانێ ب توندی شەرمەزار کر و ھشیاری دا کو کریارێن ب ڤی رەنگی یەکرێزیا نەتەوەیی و ئارامیا ئیراقێ دخە مەترسیێ.
نووری مالکی ئیرۆ یەکشەمێ، 29ێ ئادارا 2026ێ، د پەیامەکێ دە کو ل سەر حەسابا خوە یا تۆرا جڤاکی یا Xێ بەلاڤ کریە، نەرازیبوونەکە توند نیشانی ئێریشێن ل سەر مالێن سەرۆک مەسعوود بارزانی و سەرۆکێ ھەرێما کوردستانێ نێچیرڤان بارزانی نیشان دا. مالکی د پەیاما خوە دە دەستنیشان کر کو ئەڤ بنپێکرن ژ ئالیێ ھەر کەسی ڤە “رەدکری و شەرمەزارکری” نە.
مالکی د پەیاما خوە دە بال کشاند سەر باندۆرا ڤان ئێریشان و وھا گۆت:
“ئەڤ کریار نە تەنێ کەسێن دیارکری دکن ئارمانج، بەلکو زرارێ دگھینن ئەولەھی و تەناھیا ئیراقێ ب گشتی و دبن سەدەما لاوازکرنا یەکرێزیا نەتەوەیی.”
سەرۆکێ ھەڤپەیمانیا دەولەتا قانوونێ بانگ ل ھەموو ئالیان کر کو ل دژی توندووتووژیێ بسەکنن و دەستنیشان کر کو د ڤێ قۆناغێ دە ژ ھەر دەمێ بێتر پێدڤی ب ھەڤگرتنا کورێن وەلاتی ھەیە. مالکی داخواز کر کو ھەموو پێکھاتە ب ھەڤ رە ل دژی ھەولدانێن تێکدانا ئارامیا وەلات و ئافراندنا فتنەیێ راوەستن.
ئەڤ داخویانیا مالکی پشتی وێ یەکێ تێ کو دوھی، 28ێ ئادارا 2026ێ، مالا سەرۆکێ ھەرێما کوردستانێ و چەند خالێن دن ل پارێزگەھا دھۆکێ ب درۆنان ھاتن ئارمانج کرن. ئەڤ ئێریش د ئاستا ناڤخوەیی، ھەرێمی و ناڤدەولەتی دە ب بەرفرەھی ھاتن شەرمەزار کرن.
