وەزارەتا پێشمەرگە: کۆمێن تەرۆریستی یێن دەرڤەیی یاسایێ ب چار درۆنان ئێریشی بارەگەھەکە پێشمەرگە کرن
وەزارەتا پێشمەرگەیا حکوومەتا ھەرێما کوردستانێ داخویانیەک بەلاڤ کر و تێ دە دیار کر کو: “ب چار درۆنان ئێریشی بارەگەھەکە پێشمەرگە ھات کرن. ئەڤ زنجیرە ئێریش ب ئەشکەرە و ل بەر چاڤێ ئارتێش و ھێزێن ئەولەھیێ یێن ئیراقێ ل سەر ھەرێما کوردستانێ تێن کرن.”
ئیرۆ دوشەمێ، 6ێ نیسانا 2026ێ، وەزارەتا پێشمەرگە داخویانیەک وەشاند و تێ دە ھات گۆتن: “شەڤا 5ێ نیسانا 2026ێ، جارەکە دن کۆمێن تەرۆریستی یێن دەرڤەیی یاسایێ، ب رێیا چار درۆنێن بۆمبەکری ئێریشی بارەگەھەکە ھێزێن پێشمەرگەیێن کوردستانێ کرن. د رۆژێن بۆری دە ژی گەلەک جاران ئێریشێن تەرۆریستی ل دەڤەرێن جودایێن ھەرێما کوردستانێ ل سەر بارەگەھێن پێشمەرگە بەردەوام بوون.”
د داخویانیێ دە ھەر وھا ھات دەستنیشانکرن کو: “ئەڤ زنجیرە ئێریش ب ئەشکەرە و ل بەر چاڤێ ئارتێش و ھێزێن ئەولەھیێ یێن ئیراقێ ل سەر ھەرێما کوردستانێ و بارەگەھێن ھێزێن پێشمەرگە تێن کرن، و زیانێن جانی و مادییێن مەزن ب دوو خوە دە ئانینە.”
وەزارەتا پێشمەرگە بال کشاند سەر وێ یەکێ کو: “ھەتا نھا حکوومەتا فەدەرال، فەرماندارێ گشتی یێ ھێزێن چەکدار، فەرمانداریا ئۆپەراسیۆنێن ھەڤبەش و سازیێن ئەولەھیێ یێن ئیراقێ، چ ھەلوەستەکە جدی نیشان نەدانە ژ بۆ رێگرتن ل ڤان ئێریشێن تەرۆریستی و تێکدانە.”
وەزارەتا پێشمەرگە تەکەز دکە کو پێشمەرگە بەشەکە ژ سیستەما ئەولەھی و بەرەڤانیێ و ھەر تم رۆلەکە سەرەکە و ب باندۆر د پاراستنا ئەولەھیا ھەرێما کوردستانێ و ئیراقێ دە ھەیە. ژ بەر ڤێ یەکێ: “دڤێت ئەڤ دەستدرێژی ب لەز بێن راوەستاندن و تاوانبار بێن سزادان.”
د داویا داخویانیێ دە ھات دیارکرن:
“ژ بۆ بەرژەوەندیا ھەموو خەلکێ ئیراق و کوردستانێ و ژ بەر ڤێ رەوشا نەباشا نھا، مە سەبر کریە. لێ بەلێ ئەگەر حکوومەتا فەدەرال ھەر وھا بێھەلوەست بمینە، ئەم دێ نەچار ببن کو خوەدی ھەلوەستێن دن بن.”
