سهرۆك بارزانی: ئیرادەیا گەلێ کوردستانێ ژ هەموو ئێرش و درۆنان بهێزترە
سەرۆک مەسعوود بارزانی ب پەیامەکە توند ئێرشا درۆنی یا ل سەر گوندێ زەرگەزەوی یا هەولێرێ شەرمەزار کر و راگهاند، شەهیدکرنا سڤیلان نە مێرخاسییە و ئیرادەیا گەلێ کوردستانێ ب ڤان ئێرشان ناشکێ.
سەرۆک مەسعوود بارزانی ئیرۆ 7ێ نیسانێ پەیامەک بەلاڤ کر و تێ دە ئێرشا ل سەر گوندێ زەرگەزەوی وەکی “نەحەقی و زولم” پێناسە کر. هەروها سەرۆک بارزانی دیار کر کو ژ بەر “درۆنا ئیرانی” دو وەلاتیێن بێگونەهـ شەهید بوونە و ئەڤ یەک ئەنجاما “کینەکە کۆر”ە.
پەیاما سەرۆک بارزانی:
ب ناڤێ خوەدایێ مەزن و دلۆڤان
شەڤا بۆری دیسا ئێرشەکە نەرەوا ل سەر هەرێما کوردستانێ پێک هات، مخابن د ئەنجامێ دە دو وەلاتیێن بێگونەهـ ل گوندێ زەرگەزەوی یێ سەر ب پارێزگەها هەولێرێ ڤە، ب سەدەما درۆنا ئیرانی شەهید بوون. ئەڤ لووتکەیا تاوانباری و زولمێ یە؛ کو وەلاتیێن بێگونەهێن کوردستانێ ب ڤی ئاوایی و بێیی ت هنجەتەکێ، دبن هەدەفا کینەکە کۆر.
شەهیدبوونا وان هەر دو وەلاتیێن بێگونەهـ، دلێ مە هەموویان تژە ئێش و خەم کر. ئەز سەرساخیێ ژ مالبات و کەسووکارێن وان هەر دو شەهیدان رە دخوازم. خوەدایێ مەزن وان ب بهوشتا بەرین شاد بکە.
شەهیدکرنا وەلاتیێن سڤیلێن هەرێما کوردستانێ ت مێرخاسی و سەربلندی تێ دە نینە. ئیرادەیا گەلێ کوردستانێ ژ هەموو ئێرش، پەلامار و درۆنان بهێزترە و ت جاری ناشکێ. پشتا گەلێ کوردستانێ ب خوەدێ و رەواییا دۆزا خوە قاییمە.
