بووبێ ئەسەر

دژمنێ ملەتێ کورد بێی سەبەب نەگۆتنە، “ئاخ ئاقلێ کوردان یێن تالی”. واتە پشتی کو ھەر تشت دقەدە، ژ نوو دە ئاقل و ھەشێ کوردان تێ سەرێ وان. لێ ئێدی ئەو ئاقل پارە ناکە یان نەما دکارە وێرانی و خەرابیێن کو ھاتنە سەرێ وی و گەلێ وی ب شووندە ڤەگەرینە. باش ھای ژێ هەیە کو وی چ و چلۆ ب دەستێ خوە ئانیە سەر خوە. ئاھا ئەو ئاقلێ کوردان یێن وێ دەمێ، زێرینە. ژ بەر کو دژمنێ ملەتێ مە تم گۆتنە “ئاخ ئەو ئاقلێ تالی یێن کوردان ل سەرێ من با”.

ژ دەرخستنا پەکەکێ ھەتا رۆژا قاشۆ چەک دانینا وێ و داخویانیێن سەرۆکێ وێ عەڤدللا، کورد ژ نوودە ب خوە حەسیان، فێمکرن کو ژ رۆژا رۆژدە دەولەتا ترکیێ پەکەکە ژ بۆنا تێکبرنا تەڤگەرا گەلێ کورد ل ھەر چار پەرچان، دامەزراندبوو.

ئیرۆ ب ئاوایەکی بەرفرەھ تشتێن پەکەکێ، رۆل و ئەرکا وێ یا ژ بۆنا تونەکرنا ملەتێ کورد، پر ب زەلالی ھاتیە و تێ زانین. لۆما ژی پرانیا رەوشەنبیر و رۆناکبیرێن مە ل ھەمبەر ڤێ، رێیا راست، دڤێت تەکۆشینەکا چاوا بهێت دایین، دبێژن و دنڤیسینن.

ھەتا ڤر گەلەک باشە. لێ گەلۆ ئەو نڤیسانە چقاسی تێنە خوەندن؟ یا گرینگ ئەڤە. لۆما ژی پێشنیار دکم کو ئەو جامێر و جانکێن ئێدی راستی دیتنە، دڤێت جارەکێ و ژ نوو دە نڤیسێن وان رۆناکبیر و رەوشەنبیرێن وێرەک کو د دەمێن ھەری خەتەر دە ل سەر راستیا پەکەکێ نڤیساندبوون، بلا ژ نوو دە بخوینن و ببینن بێ ھن ژ وان وێرەکێن وێ دەمێ چ نڤیسیبوون و گۆتنە.

مە پرانیێ ب ھەڤرە فێم کر کو ئەو دەم و ئەو فرسەت ژ دەست مە چوو و پەکەکە ب سایا شەرێ خوە یێ ژ بۆنا تونەبوونا کوردان دکر ب سەرکەتییە. ب سەر کەتیە لێ ھندەک کێمانی ژی مانە. ئاھا ئەو کێماسی دێ چاوا هێنە تەمام کرن یا گرینگ و پرس د ڤر دەیە.

ل گۆر من، ئەم ئیرۆ ژی چ خەتەریێن مەزن کو ل سەر دەستێ دەم پارتیێ تێ مەشاندن، نابینن یان ھندەک ناخوازن وێ یەکێ ببینن. لۆما ژی زێدە بەحسا وێ ناکن. ھندەک ژ بۆنا رۆژەکێ ببن پەرلەمانتەر یان سەرۆکێ شارادەریەکێ و ھندەک ژی ژ ترسا، ھندەک ژی ژ بەر مەسەلەیا رانتێ، ل ھەمبەر بوویەر و کریارێن ژ بۆنا دەمێن بێن، ل ھەمبەر دەم پارتیێ بێدەنگن.

ئەو بێ دەنگیا ل ھەمبەر پەکەکێ چاوا وێرانی ژ بۆنا کوردان ئانی کو ئیرۆ دەنگێن دەردکەڤن زێدە باندۆرا خوە ژی نەمایە یان ناکە. سبێ ئەو پرۆژە تونەبوونا کوردان دێ ب ئاوایەکی دن و ب رێیا دەمێ دێ بکەڤە ژیانا کوردێن باکورێ کوردستانێ.

د پرۆژەیا دەمێ دە ئەو کێماسیا پەکەکێ ھشتبوو یان نکاریبوو ئەنجام بدە، نھا دێ ب رێیا دەمێ تەمام بکە. ئەو ژی ب تەمامی بێدەنگکرنا کوردان و تونەکرنا وانە. ژ بەر ڤێ پێویستە سیاسەتمەدار و رەوشەنبیرێن گەلێ کورد ژ نھا دە ڤێ ببینن و ب قاسی ژ وان تێ، دڤێت ل ھەمبەر وێ راوەستن. ڤێ راستیێ و پرۆژەیا دەمێ یا تونەکرنا کوردان ل سەر دەستێ وێ، ژ ملەتێ خوە رە ڤەبێژن.

مادەم ل ھەمبەر ڤێ، پارتیێن سیاسی یێن کوردستانی و گەلەک سیاسەتمەدارێن مە بێدەنگن، دڤێت ئەڤ بار ژ لایێ رەوشەنبیرێن ڤی گەلی بهێت ھلگرتن. د گەلەک وەلاتان دە دەما پارتیێن سیاسی نکاربن یان بێدەنگ بن. رەوشەبیر ب دەنگ دبن. دڤێت ل باکورێ کوردستانێ ژی ئەڤە بهێت دەستپێکرن.

پارتیا سەرۆکێن وێ نە کورد بن، پارتیا کو پرانیا رێڤەبرێن وێ نە کورد بن، دێ ئەو پارتی چاوا ژ بۆنا کوردان کار بکە؟ ھەتا کو ئەم ڤێ ب زەلالی، ب وێرەکی ب گەل نەدن فێمکرنێ زەحمەتە کو گاڤێن ئەرێنی یێن بەرب یەکیتیێ بێنە ئاڤێتن.

لێ کورد و ب تایبەتی پارتیێن مەیێن سیاسی کو ژ خوە رە دبێژن ئەم کوردستانی نە ڤێ نابینن، یان ژی ناخوازن ببینن. لۆما گەل و کەسایەتیێن نەزان د شاھیێن دەمێ دە ژ بۆنا تونەبوونا خوە گۆڤەندێ دگێرینن، لێ نزانە یان فێم ناکە کو ئەو گۆڤەندا داوی ئانینا ڤی ئانگۆ وان ب خوەیە.

گۆتنا تالی:

ھەگەر ژ نھا دە ھەر کوردەکی ژ وەلاتێ خوە کوردستانا شرین حەز دکە و ژ بۆنا ئازادیا وی کار نەکن، ھەگەر پارتی و تەڤگەرێن کوردستانی ل ھەمبەر ڤێ پرۆژەیا دەمێ یەکتیا ناڤ مالا خوە پێک نەینن، کورد دقەدن. وێ دەمەک هێت ئەم دێ ب تەپکان ب خوە بکەڤن، لێ ئێدی چ فایدە تێدا نابیت. وەکە رەوشا مەیا نھا…

ژ بەر ڤێ دبێژم: پارتیێن مە یێن کوردستانی، یان ھوونێ ببن یەک، یان ژی ھوونێ ھەرن یەک ب یەک و ملەتێ خوە ژی ب خوە رە تونە بکن. دێ بەرپرس و تاوانبارێ ڤێ ژی تەنھا ھوون ب خوە بن.