ھەرێما کوردستانێ نامەیەکە نەرازیبوونێ رادەستی کۆنسولخانەیا ئیرانێ کر
فەرمانگەھا پەیوەندیێن دەرڤەیا حکوومەتا ھەرێما کوردستانێ، ئیرۆ سێشەمێ 7ێ نیسانا 2026ێ، ب رەنگەکی فەرمی نەرازیبوون و نیگەرانیا خوەیا توند گھاند کۆنسولخانەیا گشتی یا کۆمارا ئیسلامی یا ئیرانێ ل ھەولێرێ.
ئەڤ ھەلوەستا دیپلۆماتیکا حکوومەتا ھەرێما کوردستانێ پشتی داخویانیێن داوی یێن کۆنسولێ گشتی یێ ئیرانێ یێ ل سلێمانیێ ھات. ھات راگھاندنا کو کۆنسولێ ناڤبۆری ھەژمارەک داخویانی و گەف ئاراستەیی خەلکێ کوردستانێ و قەوارەیا دەستووری و سیاسی یا ھەرێمێ کرنە، کو ئەڤ یەک ژ ئالیێ ھەولێرێ ڤە وەکی بنپێکرنا پیڤانێن دیپلۆماتیک ھات دیتن.
فەرمانگەھا پەیوەندیێن دەرڤە د نامەیا خوە راگهاند، حکوومەتا ھەرێما کوردستانێ نیگەرانیا خوەیا کوور ل ھەمبەر زمانێ گەفێ یێ بەرپرسێن ئیرانی نیشان دا. و د نامەیێ دە ھات دیارکرن کو ئەڤ جورەیێ داخویانیان خزمەتا پەیوەندیێن دیپلۆماتیک و بنگەھێن جیرانتیێ ناکن. هەر وەها تەکەزی ل سەر پاراستنا قەوارەیا دەستووری یا ھەرێما کوردستانێ و رێزگرتنا ل سەروەریا وێ ھات کرن.
ئەڤ گرژییا نوو یا دیپلۆماتیک د دەمەکێ دە تێ کو ھەرێما کوردستانێ د رۆژێن بۆری دە رووبروویی ئێریشێن درۆنی و مووشەکی یێن ئیرانێ ببوو، کو د ئەنجامێ دە ھەژمارەک پێشمەرگە و وەلاتیێن سڤیل شەھید و بریندار بووبوون. نامەیا نەرازیبوونێ وەکی گاڤا فەرمی یا حکوومەتا ھەرێمێ ژ بۆ راوەستاندنا گەف و دەستوەردانێن دەرڤەیی تێ نرخاندن.
