سەرۆک بارزانی: ئەم کارەساتێن ب سەرێ گەلێ مە دە ھاتنە چ جاران ژ بیر ناکین
سەرۆک مەسعوود بارزانی، ئیرۆ 16ێ نیسانێ د سالڤەگەرا 39ێ یا کیمیابارانکرنا دەڤەرا بالیسان، شێخ وەسانان و دۆلا خۆشناوەتی دە پەیامەکە سەرساخیێ و ببیرئانینێ وەشاند. سەرۆک بارزانی د پەیاما خوە دە تیرێژ خست سەر ھۆڤیتیا رەژیما بەرێ یا ئیراقێ و راگھاند کو ئەو کارەساتێن ل دژی گەلێ کوردستانێ ھاتنە کرن، د بیرا نەتەوەیی دە زندی نە.
سەرۆک بارزانی دەستنیشان کر کو تاوانێن د 16ێ نیسانا 1987ێ دە ھاتنە کرن، دەستپێکا پرۆسەیا کیمیابارانکرنا وەلاتیێن سڤیل و بەردەوامیا سیاسەتا توونەکرنا گەلێ کورد بوو. د پەیامێ دە ھات دیارکرن کو د ئەنجاما ڤێ ئێریشا کیمیاوی دە ھەژمارەکە زێدەیا خەلکێ بێگونەھ بوونە قوربانی و بریندارێن کارەساتێ ژی رووبروویێ ھۆڤیتیەکا بێوێنە بوونە.
د بەشەکە دنا پەیامێ دە، سەرۆک بارزانی بال کشاند سەر قەدەرا بریندارێن وێ کارەساتێ و ئەشکەرە کر کو رەژیما بەرێ تەنێ ب کیمیابارانێ رانەوەستیایە؛ ب دەھان بریندار پشتی گرتنێ، ب ئاوایەکی نەمرۆڤی و ب ساخی ھاتنە بناخکرن. ئەڤ یەک وەکی نیشانەیا لووتکەیا بێرەحمی و دژمناتیا ل ھەمبەری مافێن مرۆڤ و گەلێ کوردستانێ ھات بناڤکرن.
سەرۆک بارزانی د داویا پەیاما خوە دە، سلاڤ ژ بۆ گیانێ پاکێ شەھیدێن بالیسان، شێخ وەسانان و تەڤاھیا شەھیدێن کوردستانێ شاندن. بارزانی ھەڤخەمیا خوە ژ بۆ مالبات و کەسووکارێن قوربانیان نوو کر و تەکەز کر کو ئێشا ڤان تاوانان ھەر تم د دلێ وان دە دمینە و چ جاران نایێ ژبیرکرن.
