مهسروور بارزانی: دڤێ نفشێن مه بزانن کو دهستکهفتیێن مه یێن نها نه ب هێسانی هاتنه بدهستخستن
سهرۆکوهزیرێ ههرێما کوردستانێ مهسروور بارزانی د 38مین سالڤهگهرا کارهساتا ئهنفالێ ده پهیامهک وهشاند و ڕاگهاند، ئهڤ جینۆساید یهک ژ هۆڤانهترین ئۆپهراسیۆنێن قرکرنا نهژادی بوو کو ل دژی گهلێ کوردستانێ هات کرن.
سهرۆکوهزیر مهسروور بارزانی ئیرۆ 14ێ نیسانێ ب بۆنهیا سالڤهگهرا ئۆپهراسیۆنێن قرکرنێ یێن “ئهنفالێ” پهیامهک بهلاڤ کر و تێ ده دهستنیشان کر، ئهڤ کارهسات بوو سهدهما شههیدبوون و وندابوونا ب ههزاران مرۆڤێن بێگونههـ و رووخاندنا ب ههزاران گوندێن کوردستانێ.
پهیاما سهرۆکوهزیر مهسروور بارزانی:
ئۆپهراسیۆنێن ب ناڤێن ئهنفالێ، یهک ژ هۆڤانهترین پێنگاڤێن قرکرنا نهژادی و جینۆسایدێ بوون کو ژ ئالیێ ڕهژیما بهرێ یا ئیراقێ ڤه ل دژی گهلێ کوردستانێ هاتن کرن. ئهڤ کارهسات بوو سهدهما وندابوون و شههیدکرنا ب ههزاران خهلکێ بێگونههێ کوردستانێ و وێرانکرنا ب ههزاران گوندێن مه.
پێویسته ئهڤ جینۆساید و کۆمکوژیێن کو ل دژی گهلێ کوردستانێ هاتنه کرن، ههر تم د بیرا مه ده بمینن. دڤێ نفشێن مه بزانن کو دهستکهفتیێن مه یێن نها نه ب هێسانی هاتنه بدهستخستن و کهسی وهک خێر نهدایه مه؛ بهلکو ئهڤ دهستکهفتی بهرههما خهبات و خوینا ب ههزاران شههیدێن سهربلند ئێن کوردستانێ نه.
د ڤێ سالڤهگهرێ ده، ئهم جارهکه دن تهکهز دکن کو دڤێ حکوومهتا ئیراقێ بهرپرسیاریا خوه یا ئهخلاقی و دهستووری بجهـ بینه و ب ئاوایهکی شایهسته مالبات و کهسووکارێن شههید و ئهنفالکریێن کوردستانێ قهرهبوو بکه.
د 38مین سالڤهگهرا ئهنفالێ ده، سلاڤ ل گیانێ پاکێ قوربانیێن ئهنفالێ و ههموو شههیدێن کوردستانێ به.”
