د ئەنجاما روودانەکە دل ئێش یا ئەلەکتریکێ دە ل تاخا مالتایێ یا باژارێ دھۆکێ، خوەدیێ مالەکێ و کارکەرەکی ژیانا خوە ژ دەست دان و کەسەکی دن ژی ب گرانی بریندار بوو.
ل گۆری زانیاریێن کو ژ چاڤکانیێن ھەرێمی ھاتنە وەرگرتن، روودان ئیرۆ ل تاخا مالتایێ یا دھۆکێ قەومیە. کۆمەک کارکەرێن کو ژ قەزایا سێمێلێ ھاتبوون، مژوولی سازکرن و دانینا کەوانتەرەکە (دۆلاب) ئالومینیوومی بوون ژ بۆ مالەکێ. د دەما بلندکرنا کەوانتەرێ دە، پارچەیەکا ئەلەمنیوومێ ب تێلێن سەرەکی یێن ئەلەکتریکێ کەتیە و بوویە سەدەما تەزوویەکا بھێزا ئەلکتریکی.
ژ بەر دژواریا تەزوویا ئەلەکتریکێ، خوەدیێ مالێ و کارکەرەک د جھ دە ژیانا خوە ژ دەست دانە. کەسێ سێیەمێ کو ل جھێ بوویەرێ بوو، ب گرانی بریندار بوویە. تیمێن ھاوارچوونێ بریندارێ ناڤبۆری گھاندن نەخوەشخانەیێ و ل گۆری زانیاریێن پزیشکی، نھا د بن چاڤدێریا توند دەیە و رەوشا وی گرانە.
ئەڤ بوویەرا داوی، ئامارا قوربانیێن ئەلەکتریکێ ل پارێزگەھا دھۆکێ زێدە کر. ل گۆری داتایێن فەرمی یێن سالا 2026ێ، ژ دەستپێکا سالێ ھەتا نھا سێ کەسان ژ بەر روودانێن ئەلەکتریکێ ژیانا خوە ژ دەست دانە و دو کەسێن دن ژی بریندار بوونە.
پسپۆرێن وارێ ئەلەکتریکێ و بەرگریا شارستانی جارەکە دن ھشیاریێ ددن وەلاتیان و کارکەران کو د دەما کارێن ل نێزیکی تێلێن ئەلەکتریکێ دە، پیڤانێن ئەولەھیێ ل بەر چاڤ بگرن و ب تایبەتی دەما کو کەلووپەلێن کانزایی و ئالومینیوومی بکار تینن، بالدار بن.
