ل کۆبانێ چەتەیێن پەکەکێ “جوانێن شۆرەشگەر” کەچەکە 13 سالی رەڤاند
ل باژارێ کۆبانێ یێ رۆژئاڤایێ کوردستانێ، نووچەیا رەڤاندنا زارۆکەکێ ژ ئالیێ رێخستنا چەتەیێن پەکەکێ “جوانێن شۆرەشگەر” ڤە، بوو سەدەما نەرازیبوونەکە مەزن. ل گۆری ئاگاھیێن ژ چاڤکانیێن ھەرێمی، کەچا ب ناڤێ نادیا ئیبراھیم شێخ محەمەد (13 سالی)، بەریا چەند رۆژان ھاتیە رەڤاندن و ھەتا نھا چارەنڤیسا وێ نە دیارە.
پشتی کو مالباتا زارۆکێ داخوازا ڤەگەراندنا کەچا خوە کری، گرژی د ناڤبەرا وان و رێخستنێ دە دەرکەت. ھات راگھاندن کو دایکا نادیایێ، عەفاف نەعسان، ژ بۆ شەرمەزارکرنا رەڤاندنا کەچا خوە گەفا “شەوتاندنا بەدەنا خوە” خواریە. ھەر وھا ھات دیارکرن کو ئەندامێن رێخستنێ ئێریشی بابێ زارۆکێ و ئەندامێن دن یێن مالباتێ کرنە و ل وان خستنە.
دایکا زارۆکێ د ڤیدیۆیەکێ دە کو ل سەر تۆرێن جڤاکی بەلاڤ بوویە، بانگ ل فەرماندارێ گشتییێ ھێزێن سووریەیا دەمۆکراتیک (ھەسەدێ) مەزلووم عەبدی، سازیێن مافێن مرۆڤان و پارێزڤانێن مافێن زارۆکان کر کو دەستوەردانەکە لەزگین بکن دا کو کەچا وێ ڤەگەرە مالێ.
ئەڤ بوویەر د دەمەکێ دەیە کو د سالا 2019ێ دە، مەزلووم عەبدی و نوونەرا نەتەوەیێن یەکبوویی ڤرجینیا گامبا پلانەکە چالاکیێ ئیمزە کربوون. ل گۆری وێ پەیمانێ، دڤیابوو لەشکەرکرنا زارۆکێن بن 18 سالیێ دە ب داوی ببە و زارۆک ژ چالاکیێن سەربازی دوور بکەڤن. لێ رەڤاندنا زارۆکان نیشان ددە کو ئەڤ پەیمان ل سەر ئەردێ نایێ بجیھانین.
چاڤدێرێن ھەرێمی بالێ دکشینن سەر وێ یەکێ کو ئەڤ رەڤاندن وەکی پارچەیەک ژ پۆلیتیکایەکە بەرفرەھ تێ مەشاندن. تێ گۆتن کو ئارمانج ئەوە کو زارۆکێن د تەمەنێ پچووک دە ژ مالباتێن وان بێن قوتکرن و د بن ناڤێ “پەروەردەھیا فکری” دە، ژ بۆ بەشداربوونا ناڤا رەفێن چەکداری بێن ئامادەکرن.
مالباتا نادیا ئیبراھیم شێخ محەمەد داخواز دکە کو کەچا وان د زووترین دەم دە بێ بەردان و بەرپرسێن ڤێ بوویەرێ بێن دادگەهکرن.
