چەتەیێن پەکەکێ “جوانێن شۆرەشگەر” ل عاموودێ کەچەکە 15 سالی رەڤاندن
ل باژارۆکێ عاموودێ یێ سەر ب پارێزگەھا حەسەکێ ڤە، کەچەکا بچووک یا ب ناڤێ زەینەب محەمەد نوورەدین یا (15 سالی) ژ ئالیێ چەتەیێن ب ناڤێ “جوانێن شۆرەشگەر” ڤە کو راستەراست فەرمانا ژ قەندیلێ وەردگرن، ھات رەڤاندن. ھات راگھاندن کو ئەڤ بوویەر د 1ێ نیسانا 2026ێ دە قەومیە و ھەتا نھا چارەنڤیسا زارۆکێ نە دیارە.
زەینەب محەمەد نوورەدین کو ب ئەسلێ خوە شێنییا عەفرینێیە، ژیانا وێ ب کۆچبەری و ئێشان دەرباس بوویە. د سالا 2018ێ دە، دەما کو ئارتێشا ترکیەیێ و کۆمێن چەکدار عەفرین داگیر کرن، مالباتا وێ بەرێ خوە دا ھەرێما شەھبایێ یا پارێزگەھا حەلەبێ. پشتی ھلوەشینا رەژیما سووریەیێ، مالبات جارەکە دن کۆچبەر بوو و چوو باژارۆکێ تەبقایێ. د دەستپێکا سالا 2026ێ دە، ژ بەر شەر و ئالۆزییێن د ناڤبەرا ھەسەدێ و حکوومەتا سووریەیێ یا دەمکی دە، مالبات نەچار ما کو ل باژارۆکێ عاموودێ ب جھ ببە.
ھوورگولیێن بالکێش نیشان ددن کو مالباتا زەینەبێ بخوە ئالیگرێن پارتیا یەکیتیا دەمۆکراتیک (پەیەدێ) نە. ھات دیارکرن کو برایێ زەینەبێ یێ ب ناڤێ حەنان، نھا وەکی ئەندامەکی چالاک د ناڤا سازیا ئاساییشێ یا گرێدایی پەیەدێ دە کار دکە. تەڤی ڤێ یەکێ ژی، کەچا مالباتێ ژ ئالیێ رێخستنا “جوانێن شۆرەشگەر” ڤە ھاتیە رەڤاندن، کو ئەڤ یەک نیشان ددە رێخستنا ناڤبۆری د رەڤاندنا زارۆکان دە فەرقێ ناخە ناڤبەرا ئالیگرێن خوە و ئالیێن دن.
رەڤاندنا زەینەبێ د دەمەکێ دەیە کو بانگێن ناڤنەتەوەیی ژ بۆ راوەستاندنا چەکدارکرنا زارۆکان ل ھەرێمێ زێدە بوونە. مالباتێن عەفرینی یێن کو ژ بەر شەر و داگیرکەریێ مالێن خوە تەرکاندنە، نھا ل دەڤەرێن جودا رووبروویی مەترسیا رەڤاندنا زارۆکێن خوە دبن. چاڤدێرێن مافێن مرۆڤان بالێ دکشینن سەر ڤێ یەکێ کو رەڤاندنا زارۆکان د بن ناڤێ “شۆرەشگەریێ” دە، دەربەیەکە گران ل پێشەرۆژا پەروەردەھی و جڤاکی یا ھەرێمێ دخە.
