کارەساتا ل سلێمانیێ: پێشمەرگەیا بریندار ژ بەر کو نەخوەشخانەیان ئەو قەبوول نەکر شەھید کەت
پێشمەرگەیا ژن یا ب ناڤێ غەزال مەولان، کو د ئێریشەکە بالافرێن بێمرۆڤ یێن ئیرانێ دە ل نێزیکی سلێمانیێ بریندار ببوو، شەھید کەت. مالبات و بەرپرسێن وێ پارتیێ راگھاندن کو ژ بەر کو نەخوەشخانەیێن سلێمانیێ ئەو قەبوول نەکرن و دەم دەرباس بوو، غەزالێ ژیانا خوە ژ دەست دایە.
غەزال مەولان، ئەنداما کۆمەلەیا شۆرەشگەر یا زەحمەتکێشێن کوردستانا ئیرانێ (کۆمەلە)یێ بوو. د ئێریشا ئیرانێ یا ل سەر کامپا سۆرداش دە، تەڤی دو ھەڤالێن خوەیێن پێشمەرگە بریندار ببوو. پشتی ئێریشێ، غەزال ب برینەکە گران بەر ب ناڤەندا باژارێ سلێمانیێ ڤە ھات برن، لێ د ناڤبەرا نەخوەشخانەیان دە دەما وێ یا زێرین یا مانێ ھات ونداکرن.
ژ ئالیێ خوە ڤە بەرپرسێ پەیوەندیێن ھەولێرێ یێ کۆمەلەیێ، ئەمجەد حوسێن پەناھی ژ مەدیایێ رە راگھاند کو غەزال دەستپێکێ برنە نەخوەشخانەیا شۆرەش یا سەر ب وەزارەتا پێشمەرگە ڤە. ل ور چارەسەریێن دەستپێکی ھاتینە کرن، لێ ژ بەر کو جیھ نەبوویە، ئەو شاندنە نەخوەشخانەیێن دن. پەناھی دیار کر کو نەخوەشخانەیێن تایبەت یێن مینا ئاسیا و بەخشین ئەو قەبوول نەکرنە و پشتی کو گھیشتیە نەخوەشخانەیا فارووق، پشتی چەند دەقیقەیان شەھید کەتیە.
نەخوەشخانەیا بەخشینێ د بەرسڤا خوە دە دیار کر کو ل گۆری بریارا رێڤەبەرییا تەندورستیا سلێمانیێ، نەخوەشخانەیێن تایبەت نکارن “بوویەرێن دادێ” (یێن پۆلیس و ئاساییشێ) قەبوول بکن بێیی کو نڤێسارەکا فەرمی یا ئەولەھیێ لگەل بە. ژ ئالیێ دن ڤە، نەخوەشخانەیا ئاسیایێ ئیدیعا کر کو نەخوەشێ وسا قەت نەھاتیە بەر دەریێ وان.
هەر وەها مدوورێ تەندورستیا سلێمانیێ در. سەباح ھەورامی دیار کر کو پێشمەرگەیا شەھید نەھاتیە برن بۆ نەخوەشخانەیێن گشتی یێن سەر ب وەزارەتا تەندورستیێ ڤە. ھەورامی دەستنیشان کر کو نەخوەشخانەیێن مینا شۆرەش (سەر ب وەزارەتا پێشمەرگە) و نەخوەشخانەیێن تایبەت د بن دەستهلاتا وان دە نینن و بەرپرسیاریا وان جودایە.
ئەڤ بوویەر د ناڤ رایا گشتی دە بوویە سەدەما نەرازیبوونەکە مەزن، ب تایبەتی ل سەر مژارا ئەولەھی و تەندورستیا پێشمەرگەیێن کو ژ رۆژھلاتێ کوردستانێ کۆچبەری باشوور بوونە.
