چما لاھور و پۆلاد جەنگی پشتی 8 مههان ژ نووڤه دەست ب گرەڤا برچیبوونێ کرنه؟
لاھور شێخ جەنگی و برایێ وی پۆلاد، وەکی نەرازیبوونەکێ ل ھەمبەری رێکارێن یاسایی یێن دۆسیایا وان و نەبوونا سەروەرییا دادگەھێ، گرەڤا برچیبوونێ راگھاندن.
سەرۆکێ تیما پارێزەرێن لاھور شێخ جەنگی، بورھان رەشید گولە دوهـ 19ێ نیسانێ ژ کوردستان24ێ رە راگھاند، لاھور و برایێ وی پۆلاد د زیندانێ دە دەست ب مانگرتنا ژ خوارنێ (گرەڤا برچیبوونێ) کرنە.
ل گۆری گۆتنێن پارێزەر بورھان رەشید، سەدەما سەرەکەیا ڤێ بریارێ ئەوە کو داخوازا وان یا ژ بۆ ڤەگوھەستنا دۆسیایا وان بۆ دادگەھا تەمیزێ یا ھەولێرێ نەھاتییە قەبوولکرن. پارێزەر دەستنیشان کر کو موەکیلێن وی ل ھەمبەری شێوەیێ برێڤەچوونا دۆزێ و “نەھەقییا یاسایی” نە رازی نە.
“8 مەھن ئەم ب نەھهقی گرتی نە”
لاھور شێخ جەنگی د پەیامەکێ دە کو ل سەر حەسابێ خوەیێ فهیسبووكێ بەلاڤ کرییە، دیار کر کو ئەو 8 مەھن “دووری ھەموو عورفێن سازوومانی و یاسایی” ھاتنە گرتن.
لاھور شێخ جەنگی د پەیاما خوە دە ب ئاوایەکی راستەراست سەرۆکاتیا یهنهكێ تاوانبار کر و گۆت: “ژ بۆ کو دادگەھ رێیەکە یاسایی بگرە بەر خوە، مە ھەتا نھا سەبر کر. لێ دیارە کو زەختێن بافل تالەبانی و قوباد تالەبانی یێن ل سەر دادگەھ و سازییان، رێگرن ل پێشیا ڤەگوھەستنا دۆسیایا مەیا سەناریۆیی بۆ دادگەھا تەمیزێ. لەوما من و کاک پۆلاد ب ھەڤ رە بریار دا کو ژ ئیرۆ ڤە دەست ب گرەڤا برچیبوونێ بکن، ھەتا کو سەروەرییا یاسایێ د دۆسیایا مە دە پێک تێ.”
لاھور شێخ جەنگی تەکەز کر، ئەو ژ بۆ پووچکرنا سەناریۆیێن ل دژی وان، ئامادە نە جانێ خوە بدن و گۆت: “ئەم جارەکە دن ئامادە نە سەرکێشی ب ژیانا خوە بکن، دا کو ھەر کەس زانبە وە (سەرۆکاتیا یهنهكێ) ت رۆل و روومەت ژ بۆ دادگەھ و سازیێن سلێمانیێ نەھشتیە.”
