مەسروور بارزانی و فالح فەیاز ل سەر پێکانینا حکوومەتا نوویا ئیراقێ جڤیان
سەرۆکێ حکوومەتا ھەرێما کوردستانێ مەسروور بارزانی، ئیرۆ پێشوازیا سەرۆکێ دەستەیا حەشدا شەعبی فالح فەیاز کر. د ھەڤدیتنێ دە گوھەرتنێن سیاسی و ئەولەھی یێن ل ئیراق و ناڤچەیێ ھاتن نرخاندن و گرنگی ھات دایین سەر ئاڤاکرنا کابینەیەکە نوو کو مافێن ھەموو پێکھاتەیان بپارێزە.
ل گۆری داخویانیا فەرمی یا حکوومەتا ھەرێما کوردستانێ، د جڤینا کو ئیرۆ (چارشەمبێ، 29ی نیسانا 2026ێ) برێڤە چوو دە، رەوشا گشتی یا ئیراقێ و پێشھاتێن داویێ یێن دەڤەرێ ب ھوورگلی ھاتن گۆتووبێژکرن. ھەر دو ئالیان دیتن و نەرینێن خوە دەربارێ ئارامیا ھەرێمی و ھەڤسەنگیێن سیاسی دە پارڤە کرن.
بەشەکە سەرەکەیا دانوستاندنان ل سەر بزاڤێن پێکانینا کابینەیا نوویا حکوومەتا فەدەرالا ئیراقێ بوو. مەسروور بارزانی و فالح فەیاز تەکەز کرن کو دڤێت حکوومەتا بهێت ببە حکوومەتەکا “خزمەتکار” کو، داخوازێن رەوایێن ھەموو پێکھاتەیێن ئیراقێ ب جھ بینە، رێزێ ل قەوارەیا دەستوورییا ھەرێما کوردستانێ بگرە، و مافێن دارایی و قانوونییێن گەلێ کوردستانێ مسۆگەر بکە.
د ھەڤدیتنێ دە ھەر دو ئالی ل سەر گرنگیا ھەڤاھەنگیا د ناڤبەرا ئالیێن سیاسی دە ھەڤفکر بوون داکو ئیراق ژ قەیرانان رزگار ببە. ئەڤ سەردانا فەیاز د دەمەکێ دە تێ کو ل بەغدایێ ھەولێن ژ بۆ تەمامکرنا پرۆسەیا سیاسی و دەستبکارکرنا سەرۆکوەزیرێ راسپارتی ب گەرمی بەردەوام دکن.
