جڤینەکە بلند ل ھەولێرێ: سەرۆک بارزانی و عەلی زەیدی جڤیان

سەرۆکوەزیرێ راسپارتی یێ ئیراقێ، عەلی فالح زەیدی، د چارچۆڤەیا ھەولدانێن ژ بۆ پێکانینا کابینەیا نوویا حکوومەتێ دە، ئیرۆ 2یێ گولانا 2026ێ ب سەردانەکە فەرمی گھیشت پایتەختا ھەرێما کوردستانێ و لگەل سەرۆک مەسعوود بارزانی جڤیا.

عەلی زەیدی د دەما گھیشتنا خوەیا فرۆکخانەیا ناڤدەولەتی یا ھەولێرێ دە، ژ ئالیێ سەرۆکوەزیرێ ھەرێما کوردستانێ مەسروور بارزانی ڤە ب مەراسیمەکە فەرمی ھات پێشوازیکرن. د ڤێ سەردانێ دە شاندەکە بلندا چارچۆڤەیا ھەڤاھەنگیێ لگەل زەیدی یە کو کەسایەتێن وەکی فالع فەیاز (سەرۆکێ دەستەیا حەشدا شەعبی) و موحسین مەندەلاوی د ناڤ دە جھ دگرن.

پشتی مەراسیمێ، عەلی زەیدی ژ ئالیێ سەرۆک مەسعوود بارزانی ڤە ھات پێشوازیکرن. د جڤینێ دە مژارێن ستراتەژیکێن وەکی:

دیارکرنا وەزیرێن کابینەیا نوویا ئیراقێ.

ھەڤاھەنگیا ژ بۆ ئاڤاکرنا حکوومەتا نوویا ھەرێما کوردستانێ.

چارەسەرکرنا پرسێن ھلاوستی و بھێزکرنا پەیوەندیێن د ناڤبەرا ھەولێر و بەغدایێ دە ھاتن گۆتووبێژکرن.

تێ چاڤەرێکرن کو زەیدی پشتی ڤێ جڤینێ، ب جودا لگەل سەرۆکێ ھەرێما کوردستانێ نێچیرڤان بارزانی و سەرۆکوەزیر مەسروور بارزانی ژی بجڤە.

عەلی زەیدی کو د 27ێ نیسانێ دە ژ ئالیێ چارچۆڤەیا ھەماھەنگیێ ڤە وەکی بەربژێرێ فەرمی ھاتبوو نیشاندان، نھا د پێشبرکا دەمێ دەیە. ل گۆری دەستوورا ئیراقێ، دەما گشتی ژ بۆی پێکئانینا حکوومەتێ 30 رۆژن، لێ بەلێ تەنێ 25 رۆژ ل پێشیا زەیدی مانە داکو لیستەیا وەزیرێن خوە ببە پارلامەنێ و دەنگێ پێباوەریێ وەرگرە.

ئەڤ سەردانا ھەولێرێ وەکی گاڤەکە دیارکەر تێ دیتن داکو حکوومەتەکە ب پشتگریا ھەموو ئالیێن سیاسی و پێکھاتەیێن ئیراقێ وەرە ئاڤاکرن.