مەسروور بارزانی: “ئەم پشتگرێ پێکانینا حکوومەتەکە فەدەرال و مافپەروەرن”
سەرۆکوەزیرێ ھەرێما کوردستانێ مەسروور بارزانی، ئیرۆ 2یێ گولانا 2026ێ، ل هەولێرا پایتەخت پێشوازی ل سەرۆکوەزیرێ راسپارتی یێ ئیراقێ عەلی زەیدی و شاندەیا پێ رە یا “چارچۆڤەیا ھەماھەنگیێ” کر. د ڤێ ھەڤدیتنا گرینگ دە، قۆناغێن داوی یێن گۆتوبێژێن ژ بۆ ئاڤاکرنا کابینەیا نوویا حکوومەتا فەدەرال و ھەڤاھەنگیا ناڤبەرا ئالیان ھاتن نرخاندن.
ل گۆری داخویانیا فەرمی یا حکوومەتا ھەرێما کوردستانێ، سەرۆکوەزیر مەسروور بارزانی د جڤینێ دە ئامادەییا ھەرێمێ ژ بۆ پشتگریکرنا حکوومەتا نوو نیشان دا. بارزانی تەکەز کر کو ئەڤ پشتگری گرێدایی چارەسەرکرنا پرسگرێکێن ناڤبەرا ھەولێر و بەغدایێ یە ل سەر بنگەھا دەستوورێ، پاراستنا مافێن گەلێ کوردستانێ و رێزگرتنا ل قەوارەیا فەدەرالا ھەرێما کوردستانێ.
سەرۆکوەزیر بارزانی بال کشاند سەر وێ یەکێ کو نھا “دەرفەتەکە نوو” ژ بۆ ئیراقێ ھاتیە پێش داکو کێشە ب ئاوایەکی دادپەروەرانە و یەکجاری وەرن چارەسەرکرن. مەسروور بارزانی دەستنیشان کر کو دڤێت برێڤەبرنا وەلات و پێڤاژۆیا سیاسی ل سەر سێ ستوونێن سەرەکەیێن وەکی “ھەڤپاری، ھەڤسەنگی و لھەڤھاتنێ” بێتە مەشاندن داکو ئارامیا ماییندە پێک ببە.
ژ ئالیێ خوە ڤە، سەرۆکوەزیرێ راسپارتی عەلی زەیدی سپاسیا ھەلوەستا ئاڤاکەرا مەسروور بارزانی کر و راگھاند کو بھێزبوونا ھەرێما کوردستانێ د بەرژەوەندیا ھەموو ئیراقێ دەیە. زەیدی پشتراست کر کو ئەوێ د دەما دەستھلاتداریا خوە دە ب ئاوایەکی دادپەروەرانە و ل گۆری بەرژەوەندیێن گشتی سەرەدەریێ لگەل داخوازێن ھەرێما کوردستانێ بکە.
عەلی زەیدی پشتی جڤینێ ل سەر حەسابا خوە یا فەرمی یا تۆرا جڤاکی (X) دیار کر کو ئارمانجا وانا سەرەکە پێکانینا حکوومەتەکە نشتمانییە. وی تەکەز کر کو دیالۆگا ب سەرۆکوەزیر مەسروور بارزانی رە گرینگ بوو داکو داخوازێن ھەموو پێکھاتەیێن ئیراقێ د بن سیوانا ئارامی و یەکرێزیێ دە وەرن بجیھکرن.
