نێچیرڤان بارزانی و سوودانی ل سەر ئاڤاکرنا حكوومهتا نوو ئاخڤین
سەرۆکێ ھەرێما کوردستانێ نێچیرڤان بارزانی و سەرۆکوەزیرێ کاربرێکەرێ ئیراقێ محەمەد شهیاع سوودانی ل بەغدایێ جڤیان.
ھەر دو ئالیان د جڤینێ دە بال کشاند سەر وان ھەولدانێن کو ژ بۆ پێکانینا حكوومهتا نوو تێن دایین.
نڤیسگەھا محەمەد شهیاع سوودانی دەربارێ ناڤەرۆکا جڤینێ دە داخویانیەک بەلاڤ کر.
ل گۆری داخویانیێ، رەوشا گشتییا وەلات ھەولدانێن ئاڤاکرنا حكوومهتا نوو ھاتن گۆتووبێژکرن.
نڤیسگەھا سوودانی د داخویانیا خوە دە ئانی زمان کو دڤێ پێکانینا حكوومهتێ لەزتر ببە.
ھەر وھا ھات دەستنیشانکرن کو دڤێ حكوومهتا نوو ب ئاوایەکی بە کو داخواز و ھێڤیێن ھەموو خەلکێ ئیراقێ ب جھ بینە.
ناڤەرۆکا داخویانیا نڤیسگەھا سوودانی وھایە:
“مە ئیرۆ دوشەمێ سەرۆکێ ھەرێما کوردستانا ئیراقێ برێز نێچیرڤان بارزانی پێشوازی کر.
د جڤینێ دە رەوشا گشتییا وهلات ھات گۆتووبێژکرن و مە بالێ کشاند ھەولدانێن ژ بۆ پێکانینا حكوومهتا نوو.
ھەر وھا تەکەزی ل سەر وێ یەکێ ھات کرن کو دڤێ پێکانینا حكوومهتێ بلەز ببە.
دڤێ حكوومهت نوونەرتیا داخواز و ھێڤیێن ھەموو گەلێ ئیراقێ بکە.”
چارەسەریێن دەستووری ژ بۆ ھەولێر و بەغدایێ
د داخویانیێ دە ل سەر مژارا ئابۆری و پرسگرێکێن ھەولێر و بەغدایێ ژی ئەڤ ئاگاھی ھاتن دایین:
“ھەر د وێ جڤینێ دە بەحسا دەستکەفتیێن سیاسی، ئابۆری و بپێشکەتنێ ھات کرن کو د دەما خەباتێن حكوومهتا نھا دە چێبوونە.
برێز بارزانی ژی سپاسیا ھەولدانێن مە کر. وی کێفخوەشیا خوە ژ بۆ دیتنا چارەسەریێن قانوونی و دەستوورییێن د ناڤبەرا حكوومهتا فەدەرال و حكوومهتا ھەرێمێ دە نیشان دا.
ھەر وھا بەحسا روودانێن ھەرێمێ و ئالۆزیێن ھەیی ھات کرن.
گرینگیا ھەولدانێن ئیراقێ یێن ژ بۆ پشتگریا ئارامیا ھەرێمی و ناڤنەتەوەیی ھات دەستنیشانکرن.
ھات دیارکرن کو ئەڤ یەک سەروەریا وهلات خورت دکە.”
