نێچیرڤان بارزانی: دڤێت ئیراق ژ ئالۆزیێن ھەرێمی بێ دوورخستن
سەرۆکێ ھەرێما کوردستانێ نێچیرڤان بارزانی، پشتی زنجئیرەیەک ھەڤدیتنێن دیپلۆماتیک و سیاسی ل پایتەختا ئیراقێ، پەیامەکە گرینگ دەربارێ پاشەرۆژا سیاسی و ئەولەھیا وەلات ل سەر تورا جڤاکی یا Xێ بەلاڤ کر. بارزانی سەردانا خوەیا بۆ بەغدایێ وەکی “بەرھەمدار و سەرکەفتی” ب ناڤ کر و راگھاند کو ل گەل ھەموو ئالیێن سیاسی و کەساتیێن نیشتمانی ل سەر دەرباسکرنا قەیرانان ل ھەڤ کرنە.
سەرۆکێ ھەرێما کوردستانێ د پەیاما خوە دە ب فەرمی پشتگریا تەڤاھییا ھەرێما کوردستانێ ژ بۆ سەرۆکوەزیرێ راسپارتی یێ ئیراقێ راگھاند. بارزانی تەکەز کر کو ژ بۆ پێکانینا کابینەیا نوویا حکوومەتێ، ھەماھەنگیەک خورت د ناڤبەرا ھەولێر و بەغدایێ دە ھەیە، دا کو ئیراق بەر ب قۆناغەکە نوویا گەشەپێدان، تەناھی و پێشکەتنێ ڤە گاڤان باڤێژە.
د چارچۆڤەیا جڤینان دە، نێچیرڤان بارزانی بال کشاند سەر مژارێن ھەری ھەستیارێن ئەولەھی و ئابۆری. وی ب زەلالی دەستنیشان کر کو دڤێت پرەنسیپا “چەک تەنێ د دەستێ دەولەتێ دە بە” وەرە جیبجیکرن. ھەروھا، داخوازا دیتنا چارەسەریێن بلەز و بنگەھین ژ بۆ قەیرانێن ئابۆری کر، ب تایبەتی داخوازا کێمکرنا باندۆرێن نەرێنی یێن کو ژ بەر ئالۆزیێن دەڤەرێ ل سەر ئابۆریا ئیراقێ چێبوونە.
سەرۆکێ هەرێما کوردستانێ هەر وەها راگهاند، یەک ژ خالێن ھەری گرینگێن ڤێ سەردانێ، ھەلوەستا ھەرێما کوردستانێ یا دەربارێ ئەولەھیا ناڤچەیێ دە بوو. بارزانی ئەشکەرە کر کو د ھەڤدیتنان دە تەکەزی ل سەر دوورخستنا ئیراقێ ژ ھەر جورە ئالۆزی و پەڤچوونێن ھەرێمی ھاتیە کرن. وی تەکەز کر کو پاراستنا ئەولەھیا ئیراقێ و وەلاتێن جیران د بەرژەوەندیا گشتی دەیە و دڤێت ئیراق نەبە قادا شەرێن دەرەکی.
د داویا پەیاما خوە دە، سەرۆکێ ھەرێما کوردستانێ سپاسی و پێزانینێن خوە ژ بۆ پێشوازیا گەرم و دانوستاندنێن ئاڤاکەرێن ئالیێن سیاسی یێن ل بەغدایێ دیار کر. وی دەستنیشان کر کو ئەڤ نێزیکبوون و سنگفرەھیا سیاسی، بنگەھەکە ب ھێزە ژ بۆ دابینکرنا ژیانەکە ئارام و سەرفراز ژ بۆ ھەموو پێکھاتەیێن ئیراقێ.
