ل پارلامەنا ئەورۆپایێ کۆنفەرانسەکە تایبەت ل سەر کوردان تێ لدارخستن
ب ئارمانجا خورتکرنا پێگەھا کوردستانێ د قادا ناڤدەولەتی دە و پێشخستنا لۆبیا کوردی، ل ئاڤاھیا پارلامەنا ئەورۆپایێ یا ل بروکسلێ کۆنفەرانسەکە بەرفرەھ ب بەشداریا پارلامەنتەرێن ئەورۆپی و نوونەرێن دیاسپۆرایێ دەست پێ دکە.
ل پایتەختا بەلجیکا، بروکسلێ، د بن سیوانا پارلامەنا ئەورۆپایێ دە ئیرۆ کۆنفەرانسەک ژ ئالیێ کۆنفیدراسیۆنا رەڤەندا کوردستانی ڤە تێ ئۆرگانیزەکرن و تێ دە گەلەک کەسایەتێن سیاسی یێن ئەورۆپی و کورد ئامادە دبن.
ل گۆری بەرنامەیا کۆنفەرانسێ، د دەستپێکا ڤەکرنێ دە دێ پەیاما سەرۆک مەسعوود بارزانی ژ بۆ بەشداران وەرە خوەندن. ئارمانجا سەرەکە یا ڤێ کۆمبوونێ ئەوە کو لۆبیا کوردی ل ناڤەندێن بریاردانێ یێن جیھانێ وەرە خورتکرن و دەنگێ گەلێ کوردستانێ ب ئاوایەکی فەرمیتر بگھە پارلامەنتەرێن ئەورۆپایێ.
تێ چاڤەرێکرن کو د کۆنفەرانسێ دە ل سەر چەندین دۆسیایێن گرینگێن تێکلداری ھەرێما کوردستانێ، ئيراق و گەشەدانێن داوی یێن ل رۆژھلاتا ناڤین وەرە سەکناندن. بەشدار دێ بالێ بکشینن سەر پێگەھا ستراتەژیکا کوردستانێ و پەیوەندیێن دیپلۆماتیکێن ب وەلاتێن ئەورۆپایێ رە.
کۆنفەرانس ئیرۆ ساعەت 15:00ان (ب دەما ھەولێرێ) دەست پێ دکە. ھەژمارەکە بەرچاڤا پارلامەنتەرێن ئەورۆپی، نوونەرێن کوردێن دیاسپۆرایێ و چاڤدێرێن سیاسی د کۆنفەرانسێ دە ئامادە دبن، دا کو ل سەر سبەرۆژا پەیوەندیان و پشتگریا ناڤدەولەتییا ژ بۆ کوردستانێ گۆتووبێژان بکن.
