مەحما خەلیل: گرووپێن چەکدار ل شنگالێ ئێزدیان ژ بۆ بەرژەوەندیێن خوە ب کار تینن
رەوشا ئاساییشێ یا ل شنگالێ جارەکە دن تووشی ئالۆزیان بوویە. ل گۆری ئاگاھیێن ھەری داوی، ژ شەڤا بۆری ڤە گرووپێن چەکدارێن ل ھەرێمێ دەست ب تەڤگەرێن نەیاسایی کرنە. ئارمانجا ڤان تەڤگەران وەکی ئاستەنگکرنا ڤەگەرا رەواتیا باژار و جیبجیکرنا پلانێن سیاسی یێن تایبەت تێ نرخاندن.
پارلامەنتەرێ بەرێ یێ ئیراقێ، مەحما خەلیل، د داخویانیەکێ دە بال کشاند سەر خەتەرەیا ڤان گرووپان و دیار کر کو ھنەک نەیار، گەلێ ئێزدی ژ بۆ ئارمانجێن خراب و بەرژەوەندیێن خوەیێن تەنگ ب کار تینن. مەحما خەلیل دەستنیشان کر کو ئەڤ گرووپ د بن سیبەرا چەکان دە ھەول ددن ئیرادەیا خەلکێ ھەرێمێ بندەست بکن.
مەحما خەلیل د بەردەوامیا ئاخافتنا خوە دە ھشیاریەکە توند دا وان کەسێن کو ل شنگالێ ھەڤکاریا گرووپێن چەکدار دکن. وی گۆت: “ھەموو خەلک دزانە کو ئارمانج و نیەتا ڤان کەسان خرابە. رۆژەک دێ بێ کو خەلکێ ئێزدی وان کەسان جەزا بکە، یێن کو ئێزدیان ژ بۆ بەرژەوەندیێن خوەیێن تەنگ ب کار تینن.”
ل گۆری چاڤدێرێن ھەرێمی، ئەڤ تەڤگەرێن چەکداری یێن نەیاسایی ب مەبەستا رێگرتنا ل ڤەگەرا سازیێن فەرمی و برێڤەبرنا باژار ب رەنگەکی دەستووری تێنە کرن. ھەیا کو گرووپێن نادەڤەلەتی ل ھوندرێ شنگالێ چالاک بن، ئارامیا ماییندە و ڤەگەرا کۆچبەران وەکی کێشەیەکە مەزن ل پێشیا ھەرێمێ دمینە.
