كۆمیتهیهكا بلند بۆ چهكدانانا پهكهكێ و ڤهگهریانا گهریلایان تێ ئاڤا كرن
ووردهكاریێن پرۆژهیاسایا كو ژ بۆ پێشڤهچوونا پێڤاژۆیا ئاشتیێ تێ ئامادهكرن ئاشكرا بوون. تێ پلانكرن كو ژ بۆ چاڤدێریكرنا پرۆسهیا دانانا چهكى ژ هێلا پهكهكێ ڤه و كارێن پێكهاتنا جڤاكى، »كۆمیتهیا چاڤدێری و ههماههنگیا یهكگرتنا جڤاكی» وهره ئاڤاكرن.
ل گوری نووچهیا تایبهت یا مالپهرا «Haberler.com»كارێن یاسایی یێن دهربارێ پێڤاژۆیا ئاشتیێ بلهز كهتنه. ههروهها ووردهكاریێن وێ میكانیزمێ ژى ئاشكرا بوون یا كو دهێته پلانكرن پشتی پشتراستكرنا دانانا چهكى ژ لایێ پهكهكێ ڤه بكهڤیته كار.
تێ پلانكرن كو ناڤێ وێ پرۆهیاسایێ ببیته » پرۆهیاسایا ئێكگرتنا جڤاكى و پشتگیریا نهتهوهیی.« ل گۆری ڤێ پرۆهیاسایێ، كۆمیتهیهك دێ ههمی پێڤاژۆیێ و میكانیزمێ چاڤدێرى كهت. ناڤێ وێ كۆمیتهیێ دێ بیته «كۆمیتهیا چاڤدێری و ههماههنگییا یهكگرتنا جڤاكى«.
كۆمیته دێ ههمی پێڤاژۆیێ چاڤدێرى كهت
كۆمیته دێ ههم ههماههنگیێ د ناڤبهرا سازیان دا دابین كهت، و ههم ژى د چارچۆڤهیا ئهو زانیاریێن ژ مهیدانێ تێن، دێ چاڤدێرییا وان رێكاران كهت یێن كو دێ دهربارێ وان گهریلایان هێنه بجهئینان كو چهكى ددانن.
د ناڤ كۆمیتێ دا نوونهرێن ڤان سازییان ههنه:
سهرۆكاتیا میتێ.
وهزارهتا ناڤخۆ.
وهزارهتا بهرگریێ.
وهزارهتا دادێ.
وهزارهتا خێزان و خزمهتگۆزاریێن جڤاكى.
وهزارهتا كار و ئهولههییا جڤاكى.
وهزارهتا ساخلهمیێ.
كۆمیته دێ د چارچۆڤهیا پێڤهرێن ئۆبجێكتیڤ و كۆنترۆلكری دا، پرۆسهیا دانانا چهكى و بهلاڤبوونا پهكهكێ چاڤدێرى كهت و دهستنیشان كهت. پشتی دهێته سهلماندن كو دانانا چهكى ب دوماهى هاتییه، ئهڤ كۆمیته دێ بۆ گونجاندنا ئهندامێن رێخستنا پهكهكێ دگهل ژیانا جڤاكى، پلانان ئاماده كهت.
كۆمیته دێ د ههمان دهم دا قۆناغێن پرۆسهیا چهكدانانێ ب شێوهیهكێ دهمكی وهك راپۆرت پێشكێشى سهرۆكاتیا پهرلهمانێ تركیێ كهت. میكانیزمهك دێ هێته بجهئینان كو بڕیارێن كۆمیتێ ژ هێلا سازیێن گشتی یێن جودا ڤه بهێنه بجهئینان و دێ هێته دابینكرن كو سازی پێكڤه كار بكهن.
