راپۆرا ھەڤدیتنا ئیمرالیێ هات پارڤەکرن: ئۆجالان دیسا دژاتیا رێبازا بارزانی کر
ئاگاھیێن نوویێن ژ ھەڤدیتنا عەبدوللاھ ئۆجالان یا 28ێ نیسانا 2026ێ نیشان ددن کو د ناڤبەرا “خەتا ئیمرالیێ” و “خەتا بارزانی” دە شەرەکی کوور یێ ئیدەۆلۆژیک و پۆلیتیک دەرکەتیە هۆلێ. ئۆجالان د ڤێ ھەڤدیتنێ دە نە تەنێ ل سەر رەوشا خوە یا تەندورستیێ، ھەر وەھا ل سەر ستراتەژیا نوو یا کوردان ل رۆژھلاتا ناڤین نرخاندنێن رادیکال کرنە.
ئۆجالان د دەستپێکا ئاخافتنا خوە دە بال کشاند سەر نەشتەرگەرییا چاڤێ خوە و دیار کر کو ئەڤ یەک دێ ببە سەدەم کو دیتنا وی 20% باشتر ببە. وی ئەڤ رەوش وەکی نموونەیەکێ ب کار ئانی و دەستنیشان کر کو ئەو ئێدی د ناڤا “مژ و دومانێ” دە نامینە، ھەم د وارێ فیزیکی دە ھەم ژی د وارێ سیاسی دە قۆناغەکە نوویا “چاڤڤەکری” دەست پێ دکە.
مژارا ھەری بەرفرەھ و توند یا ھەڤدیتنێ، دژبەریا ئۆجالان یا ل ھەمبەری پەدەکێ و مالباتا بارزانی بوو. ئۆجالان راستەراست ل دژی رێبازا بارزانی کو داخوازا ستاتویەکە سەربخوە ژ کوردان رە دکە سەکنی و راگهاند، بارزانی دخوەست سسیستەمەکە وەکە هەولێرێ ل “باکور رۆژهلاتێ سووریەیێ” رۆژئاڤایێ کوردستانێ ئاڤا بکە، لێ من رێ ل بەر ڤێ هەولدانا وی گرت.
ئۆجالان ئیدیعا کر کو مەسعوود بارزانی ب پشتگریا ئامەریکا و ئیسرایلێ ھەول دایە ل رۆژئاڤا (باکور و رۆژھلاتێ سووریەیێ) سیستەمەکە مینایا ھەولێرێ ئاڤا بکە. ئۆجالان گۆت، “من ئەڤ پلان دیت و من مداخەلە کر. من ژ مەزلووم عەبدی رە گۆت کو ئەڤە خەفکە و دڤێت ئەو خوە ژێ ڤەکشینن.” ل گۆری ئۆجالان، ئەڤ ھەولدان ب ئارمانجا تەسفیەکرنا خەتا وی ھاتیە کرن.
ئۆجالان بەحسا سەردانا بارزانی یا ل سینۆرێ جزیرێ ژی کر و دیار کر کو ئەڤ نە سەردانەکە ئاسایی بوو. وی گۆت کو بارزانی ب نیشاندانا ھێزا خوەیا چەکداری خوەستیە پەیاما “ئەڤ دەر ملکێ منە” بدە ئیمرالیێ. ئۆجالان ل سەر ڤێ یەکێ گۆت: “نەفرەتا من نھا گھیشتیە خالا شکەستنێ.”
ئۆجالان ژ بۆی ڤەشارتنا خایینتیا خوە و رەواکرنا ئایدۆلۆژییا خوە یا دژە کوردستانی خەتا بارزانی وەکی “عەشیری، مالباتی و دەستھلاتدار” پێناسە کر. وی دەستنیشان کر کو ئەو چل سالن ل دژی ڤێ زیھنیەتێ شەری دکە و پشتی کو پێڤاژۆیا ب دەولەتێ رە ب ئەنجام ببە، ئەو دێ تێکۆشینەکە هێژ مەزنتر ل دژی ڤێ خەتێ بدە دەستپێکرن.
ئۆجالان د راپۆرێ دە ل دژی داخوازێن “فەدەراسیۆن” و “سەرخوەبوونێ” ژی سەکنی. وی کەسێن وەکی کەمال بورکای و ئیبراھیم گووچلوو رەخنە کرن و دیار کر کو نەتەوەپەرەستیا کورد یا کلاسیک خزمەتا بەرژەوەندیێن ھێزێن دەرڤە دکە. ئۆجالان ب ئاوایەکی فەرمی راگھاند کو ئارمانجا وی نە پارچەکرنا سینۆرانە، لێ بەلێ “ئەنتەگرەبوونا ب کۆمارا ترکیەیێ رە” ل سەر بنگەھا مافێن دەمۆکراتیکە.
ئۆجالان ب زمانەکی پر فەرمی و بریاردار گۆت: “من رێخستن بێچەک کر و ھلوەشاند.” وی راگھاند کو دەما شەرێ چەکداری ب داوی بوویە و قەندیل نھا د ناڤا ڤالاھیەکێ دەیە. ئۆجالان رەخنە ل رێڤەبەریا قەندیلێ گرت کو ئەو نکارن خوە ب “پارادیگمایا نوو” رە بگونجینن و تەنێ ئەو دکارە رێ ل بەر گوھەرینەکە مەزن ڤەبکە.
ئۆجالان د دەربارێ سەلاحەدین دەمیرتاش و پارتیا دەمێ دە ژی پەیامێن ھشک دان. وی دیار کر کو چ کەس نکارە ل دەرڤەیی ئیرادەیا وی پۆلیتیکایێ بمەشینە. ئۆجالان دەستنیشان کر کو ھەگەر کەسەک بخوازە د ڤێ پێڤاژۆیێ دە جھ بگرە، دڤێت ب تەمامی ل گۆری تەعلیماتێن وی تەڤبگەرە، ئەگەر نە ئەو دێ “دەنگێ وان ببڕە.”
ئۆجالان د داویا راپۆرێ دە دیار کر کو ئەو ل سەر “پلانەکە چارەسەریێ یا دەمکی” دخەبتە. ئەڤ پلان داخواز دکە کو دەولەت د ناڤا سالەک و نیڤان دە چارچۆڤەیەکە یاسایی ئامادە بکە. ئۆجالان گۆت: “ھەگەر ئەڤ نەبە، ئەز دێ ڤەکشم.” ئۆجالان ب ڤێ داخویانیێ خەتا خوەیا داوین دیار کر کو ئەو ژی ئەڤە، “تەسلیمبوون و ئەنتەگراسیۆنا ب دەولەتا ترکیەیێ رە”.
