دەم پارتی: ھەڤدیتنێن میت و قەندیلێ راستن لێ ئاگاھیێن مە کێمن
ھەڤسەرۆکا پارتیا وەکھەڤی و دەمۆکراسیێ یا گەلان (دەم پارتی) تولای ھاتیمۆغلاری، نووچەیێن دەربارێ روونشتن و ھەڤدیتنێن ناڤبەرا تەشکیلاتا ئیستخباراتا نەتەوەیی یا ترکیەیێ (میت) و سەرۆکاتیا پارتیا کارکەرێن کوردستانێ (پەکەکێ) دە پشتراست کرن. ھاتیمۆغلاری دیار کر کو پەیوەندیێن ب ڤی رەنگی ھەنە، لێ روونشتن ب ئاوایەکی گرتی ب رێڤە دچن و ئاگاھیێن وان ل سەر ناڤەرۆکێ کێمن.
ھەڤسەرۆکا دەم پارتیێ تولای ھاتیمۆغلاری، دەربارێ ئیدیعایێن کو د مەدیایا ناڤخوەیی یا ترکیەیێ دە دەرکەتنە راگھاند کو زانیاریێن وان ل سەر ھەبوونا ڤان ھەڤدیتنان ھەنە، لێ بال کشاند سەر ھوورگلیێن پرۆسەیێ و وھا گۆت: “راستە، ھەڤدیتن تێن کرن؛ لێ ئاگاھیێن مەیێن بەرفرەھ ل سەر ناڤەرۆکا وان جڤینان نینن. پێڤاژۆیا ئاشتیێ نھا ب سستی ب رێڤە دچە و ئەم نزانن کا ئەڤ جڤین دێ ڤێ سستیێ ژ ھۆلێ راکن یان نا.”
ل گۆری نووچەیێن کو د چاپەمەنیا نێزیکی حکوومەتا ترکیەیێ دە جھ گرتنە، شاندەیەکە تایبەتا میتێ لگەل رایەدارێن پەکەکێ یێن ل قەندیلێ د پەیوەندیێ دەیە. تێ دیارکرن کو سازیا ئیستخباراتێ داخواز ژ پەکەکێ کریە کو د ناڤا چەند رۆژان دە نەخشەرێ، پلان و مەرجێن خوەیێن تایبەتێن ژ بۆ چەکدانینێ و دیارکرنا چارەنووسا ئەندامێن خوە رادەستی حکوومەتێ بکە. ل گۆری چاڤکانیان، پشتی رادەستکرنا ڤێ نەخشەرێیێ، دێ داخوازێن ھەر دو ئالیان وەرن بەراوردکرن داکو بریارەکە ھەڤپار ل سەر پێنگاڤێن پاشەرۆژێ وەرە دایین.
ئەڤ گەشەدانێن نوو، بەردەوامیا وێ پێڤاژۆیێ نە کو د جۆتمەھا 2024ێ دە ب دەستپێشخەریا سەرۆکێ مەھەپێ دەولەت باخچەلی دەست پێ کربوو. باخچەلی وێ دەمێ بانگ ل عەبدوللاھ ئۆجالان کربوو کو ژ بۆ ھلوەشاندنا رێخستنێ بانگەوازیێ بکە.
د قۆناغێن پشترە دە و د چارچۆڤەیا ڤێ نەخشەرێیێ دە، رۆژا 27ێ سباتا 2025ێ عەبدوللاھ ئۆجالان بانگەکە دیرۆکی کر داکو داوی ل ستراتەژیا تێکۆشینا چەکداری وەرە ئانین. ل سەر ڤێ بانگا ھەری داوی، پەکەکێ د کۆنگرەیا خوەیا 12ێ دە کو د 5ی گولانا 2025ێ دە پێک ھات، بریارا فەرمی یا هلوەشاندنا خوە یا رێخستنی دا و ب ڤی رەنگی پرۆسەیا چەکدانینێ دەرباسی قۆناغەکە نوویا پراکتیکی بوو.
