د چارچۆڤەیا پێڤاژۆیا کو ترکیە وەکی “ترکیەیا بێ تەرۆر” ب ناڤ دکە دە، تێ چاڤه‌رێكرن کو د ناڤ 10 رۆژان دە راپۆرا سازیێن ئەولەھیێ یا ل سەر چەکدانینا په‌كه‌كێ پێشکێشی حکوومەتێ بێ کرن. پشتی راپۆرێ، دێ ل پارلامەنا ترکیەیێ گاڤێن یاسایی وەرن ئاڤێتن.
رۆژنامەیا مللیه‌ت یا نێزی دەستھلاتا ترکیەیێ راگھاند، سازیێن ئەولەھیێ ل سەر رەوشا مەیدانی یا چەکدانینا په‌كه‌كێ راپۆرەکە “ھەستیار و دیارکەر” ئامادە دکن. تێ چاڤه‌رێكرن کو ئەڤ راپۆر د ناڤ 10 رۆژان دە بگھە بەر دەستێ حكوومه‌تێ.
چاڤکانیێن ژ پارتیا داد و گەشەپێدانێ (ئاک پارتی) ئیدیعایێن کو دبێژن “پێڤاژۆ سست بوویە” رەد دکن و تەکەز دکن کو خەبات بەردەوامن. ل گۆری زانیارییان، پشتی ئامادەبوونا راپۆرا سازیێن ئەولەھیێ، پارلامەنا ترکیەیێ و سازیێن دەولەتێ دێ دەست ب گاڤێن یاسایی و ئیداری بکن. بەرپرسێن ئاک پارتیێ ئیشارەتێ ب دەرخستنا قانوونێن نوو دکن، دا کو چارەنووسا کەسێن چەکان داتینن، ب رێیێن سیاسی و یاسایی د بن سیوانا پارلامەنێ دە وەرە دیارکرن.
ئەڤ گەشەدان د دەمەکێ دە نە کو پارتیا کارکەرێن کوردستانێ (په‌كه‌كه) د ئەنجامنامەیا 12مین کۆنگرەیا خوە دە (کو د ناڤبەرا 5-7عێ گولانا 2025ان دە پێک ھاتبوو)، ب فەرمی راگھاندبوو کو وان داوی ل شەرێ چەکداری ئانیە و سازیا خوەیا رێخستنی ھلوەشاندیە.
