دەم پارتی: ژ بۆ پێڤاژۆیا ئاشتیێ پێویستی ب نەخشەرێیەکە قانوونی ھەیە
سەرۆک فراکسیۆنا کۆما پارتیا دەمۆکراسی و وەکھەڤیێ یا گەلان (دەم پارتی) گولستان کلچ کۆچییگیت، دەستنیشان کر کو ژ بۆ بەردەوامی و مسۆگەرکرنا پێڤاژۆیا سیاسی و ئاشتیێ، دڤێt پارلیمان و دەستھلاتداری دەملدەست گاڤێن حقووقی باڤێژن. کۆچییگیت دا زانین کو ئێدی قۆناغا داخویانیان ب داوی بوویە و دەما ئاڤێتنا گاڤێن پراکتیکییە.
سەرۆک فراکسیۆنا کۆما دەم پارتیێ گولستان کلچ کۆچییگیت، ئیرۆ 20ی گولانێ د کۆنفەرانسەکە رۆژنامەڤانی یا ل پارلیمانێ دە، بال کشاند سەر روودانێن سیاسی یێن داوی و گەشەدانێن گرێدایی نەخشەرێیا ئاشتیێ. کۆچییگیت دیار کر کو ژ بۆ ئاساییبوون و پێشڤەچوونا پێڤاژۆیێ، بەرپرسیاریەکە مەزن دکەڤە سەر ملێ سازیێن سیاسی و ب تایبەتی مەجلیسا مەزن یا نەتەوەیی یا ترکیەیێ. رەفرانسا وێ یا بنگەھین ژی راپۆرا کۆمیسیۆنا مەجلیسێ یا بەرێ بوو کو وەکی رێبەرەکێ نرخاند.
“چاڤێ رایا گشتی ل مەجلیسێ و ل چێکرنا قانوونانە. راپۆرا مەجلیسێ ژ بۆ ھەر کەسی وەک نەخشەرێیەکە و گاڤێن قۆناغا دویەمین دیارن.”
د بەردەوامیا داخویانیا خوە دە، کۆچییگیت نرخاندن ل سەر پەیامێن داوی یێن سەرۆکێ گشتی یێ مەھەپێ دەولەت باخچەلی ژی کر. کۆچییگیت داخویانیێن باخچەلی وەکی پێنگاڤێن گرنگ وەسفاندن و دەستنیشان کر کو د سەری دە عەبدوللاھ ئۆجالان و ھەموو ئالیێن پەیوەندیدار ژ بۆ پێشڤەبرنا ڤێ پێڤاژۆیێ د ناڤا ھەولدانان دە نە. لێ بەلێ وێ تەکەز کر کو بنگەھا ئاشتیەکە ماییندە تەنێ ب رێیێن حقووقی و دەستووریێ دکارە وەرە ئاڤاکرن.
کۆچییگیت بانگ ل حکوومەتێ و ئالیێن دەستھلاتدار کر کو د وارێ قانوونی دە ب وێرەکی گاڤان باڤێژن و دەستنیشان کر کو ھەر مسۆگەریەکە حقووقی دێ پەرگالا دەمۆکراسیێ یا ل وەلات بھێزتر بکە.
د ئەنجاما داخویانیا خوە دە، سەرۆک فراکسیۆنا دەم پارتیێ ئامادەبوونا پارتیا خوەیا ژ بۆ گرتنا ھەر جوورە بەرپرسیاریا سیاسی نیشان دا و راگھاند کو سەرکەفتنا ڤێ پێڤاژۆیێ دێ د بەرژەوەندیا تەڤاھیا جڤاکێ دە ببە. کۆچییگیت گۆتنا خوە ب ڤێ بانگاوازیێ ب داوی کر: “ئێدی نە دەما گۆتنانە، دەما پراکتیکێیە.”
