پێگههێ باخچەلی ژ بۆ ئۆجالان پێشنیاز كری؛ دێ چاوا خزمەتا تركیێ كهت؟
سەرۆکێ پارتیا نەتەوەپەرەست مهههپێ، ب فەرمی پێشنیار کربوو پێگەھەک ل ژێر ناڤێ “کۆردیناتۆرێ پێڤاژۆیا ئاشتیێ و تێکھەلبوونا سیاسی” ب ئۆجالان بێ دایین، ئارمانج ژ ڤێ پێشنیارێ ھلوەشاندنا ب تەڤاھییا رێخستنا پهكهكێ یه.
پێڤاژۆیا ئاشتیێ دەمەکە تو پێشکەتنێن بەربچاڤ ب خوە ڤە نەدیتنە، موراد قارایلان چەند رۆژان بەرێ دەولەتا ترك ب جەمداندنا پێڤاژۆیێ سووجدار کر، ئاكهپێ ژی جارەکە دن مەرجێن دەرخستنا رێزكنامەیێن قانوونی ب چەکدانانا ب تەڤاھی ڤە گرێدابوو.
دەولەت باھچەلی چەند رۆژان بەرێ گۆتبوو: “بلا ئەبدوڵاھ ئۆجالان، ببە کۆردیناتۆرێ پێڤاژۆیا ئاشتیێ و تێکھەلبوونا سیاسی.”
ئارمانج ژ ڤێ پێشنیازا باخچەلی ئەو بوو کو ئۆجالان ژ زیندانا خوەیا ئیمرالیێ، ب پشتگریا لۆژیستیک و چاڤدێریا دەولەتێ، پەیوەندیێ ب رێبەرێن پهكهكێ ل ئیراق و سووریێ بکە ژ بۆ جیبجیکرنا تەلیماتێن پێڤاژۆیا چەکدانانێ. باخچەلی دیار کربوو کو ئەڤ پێگەھ تەنێ ژ بۆ ھلوەشاندنا پهكهكێ و پێگەھەکێ سیاسی بۆ نوونەراتیا کوردان نادەتە ئۆجالان.
راپۆرتێن مەدیایی ئاشکەرە دکن کو پارلامەنا ترکیەیێ ئامادەکاریێن دەرخستنا یاسایەکێ ژ بۆ ڤەگەریانا گەریلایان دکە و ئەڤ ئامادەکاری بەر ب داویێ نە، د ڤێ یاسایێ دە مۆھلەتەک دهمكورت یا (یەک تا دو ھەیڤ) بۆ گەریلایان ھەیە کو چەکی دەینن و ڤەگەرن.
د چارچۆڤەیا پێڤاژۆیا ئاشتیێ دە کو ترکیە وێ وەکی “ترکیەیا بێ تەرۆر” ب ناڤ دکە دە، تێ چاڤەرێکرن کو د ناڤ ھەفتیەکێ دە راپۆرا سازیێن ئەولەھیێیا ل سەر چەکدانینا پهكهكێ پێشکێشی حکوومەتێ بێ کرن. پشتی راپۆرێ، دێ ل پارلامەنا ترکیەیێ گاڤێن یاسایی وەرن ئاڤێتن.
چاڤکانیێن ژ پارتیا داد و گەشەپێدانێ (ئاک پارتی) ئیدیعایێن کو دبێژن “پێڤاژۆیا سست بوویە” رەد دکن و تەکەز دکن کو خەبات بەردەوامن. ل گۆری زانیاریان، پشتی ئامادەبوونا راپۆرا سازیێن ئەولەھیێ، پارلامەنا ترکیەیێ و سازیێن دەولەتێ دێ دەست ب گاڤێن یاسایی و ئیداری بکن. بەرپرسێن ئاک پارتیێ ئیشارەتێ ب دەرخستنا قانوونێن نوو دکن، دا کو چارەنووسا کەسێن چەکان داتینن، ب رێیێن سیاسی و یاسایی د بن سیوانا پارلامەنێ دە وەرە دیارکرن.
ئەڤ گەشەدان د دەمەکێ دە نە کو پهكهكێ د ئەنجامنامەیا 12مین کۆنگرەیا خوە دە کو د ناڤبەرا 5-7ێ گولانا 2025ان دە پێک ھاتبوو، ب فەرمی راگھاندبوو کو وان داوی ل شەرێ چەکداری ئانیە و سازیا خوەیا رێخستنی ھلوەشاندیە.
ھەروھا د 9ێ تیرمەھا 2025ان دە، پشتی پەیامەکە ڤیدیۆیی یا ئۆجالان، ل نێزیکی شکەفتا جاسەنەیا ل دەڤەرا سورداشا پارێزگەھا سلێمانیێ، ب بەشداریا 30 ئەندامێن پهكهكێ مەراسیمەک ھاتبوو لدارخستن. د وێ مەراسیمێ دە پشتی خوەندنا داخویانیا چەکدانینێ، 30 چەک ھاتبوون شەوتاندن.
