سەرۆکوەزیر مەسروور بارزانی و ھەڤتایێ خوەیێ ئیراقی عەلی زەیدی ل بەغدایێ جڤیان
سەرۆکوەزیرێ ھەرێما کوردستانێ مەسروور بارزانی، ل بەغدایا پایتەختا ئیراقێ، ژ ئالیێ سەرۆکوەزیرێ ئیراقێ عەلی زەیدی ڤە ھات پێشوازیکرن. ھەر دو سەرۆکوەزیران ل کۆشکا سەرۆکاتیا حکوومەتێ جڤینەکە گرنگ پێک ئانین و ل سەر تێکلیێن ھەولێر و بەغدایێ گۆتووبێژ کرن.
ل گۆری زانیاریێن کو ژ چاڤکانیێن ئاگاھدار ھاتنە گرتن، د ھەڤدیتنێ دە سەرۆکوەزیر مەسروور بارزانی ب توندی تەکەزی ل سەر دابینکرنا مافێن دەستووری یێن ھەرێما کوردستانێ کر. بارزانی دیار کر کو ھەرێما کوردستانێ ھەموو ئەرکێن خوەیێن ل ھەمبەر حکوومەتا فەدەرال یا بەغدایێ ب جھ ئانینە، ژ بەر وێ یەکێ ژی مافێ گەلێ کوردستانێیە کو شایەستەیێن خوەیێن دارایی و دەستووری بێیی چ ئاستەنگیان وەرگرە.
د بەردەوامیا جڤینێ دە، پرسێن سەرەکە و ناکۆکیێن د ناڤبەرا ھەر دو حکوومەتان دە ب ھوورگولی ھاتن نرخاندن. د ڤێ چارچۆڤەیێ دە، پرۆسەیا تەمامکرنا کابینەیا حکوومەتا عەلی زەیدی بوو مژارەکە گرنگا رۆژەڤێ. ھات دەستنیشانکرن کو ژ بەر نەبوونا لھەڤھاتنا سیاسی، هێژ 9 وەزیرێن کابینەیا نوو دەنگێ باوەریێ ژ پارلامەنتۆیا ئیراقێ وەرنەگرتنە و ئەڤ یەک ئاستەنگیێ د خەباتێن حکوومەتێ دە چێدکە.
ھات راگھاندن کو ئەڤ سەردانا فەرمی یا سەرۆکوەزیرێ ھەرێما کوردستانێ یا ژ بۆ بەغدایێ وێ دو رۆژان بەردەوام بکە. مەسروور بارزانی د دەما مایینا خوە دە، ب سەرکردە، سەرۆکێن پارتیان و بەرپرسێن پایەبلندێن ئیراقێ رە رێزە جڤینێن گرنگ پێک تینە.
د رۆژا یەکەما سەردانێ دە، بریارە سەرۆکوەزیر لگەل کەسایەتیێن دیارێن وەکی ھەیبەت حەلبووسی، سەرۆکێ ئەنجوومەنا بلندا دادوەری فایەق زێدان، موسەننا سامەرایی، محەممەد حەلبووسی، ھادی عامری، حەیدەر عەبادی، فالح فەیاز و ئەحمەد ئەسەدی بجڤە. د ڤان ھەڤدیتنان دە ئاسۆیێن چارەسەرکرنا قەیرانێن ناڤخوەیی دێ هێن گۆتووبێژکرن.
د رۆژا دویەما بەرنامەیا سەردانێ دە ژی، بریارە مەسروور بارزانی لگەل سیاسەتمەدار و بەرپرسێن وەکی خەمیس خەنجەر، قاسم ئەعرەجی، محەمەد شیاع سوودانی، نووری مالکی، قەیس خەزعەلی، عادل عەبدولمەھدی، ھومام حەموودی، ئەسەد عیدانی و ئەیاد عەلاوی بجڤە.
چاڤدێرێن سیاسی دەستنیشان دکن کو ژ بلی پرسگرێکێن ناڤخوەیی یێن وەکی بودجە و نەفتێ، د جڤینان دە رەوشا ھەرێمێ و گەشەدانێن داوی یێن سیاسی یێن رۆژھلاتا ناڤین ژی تێن نرخاندن. ئەڤ گاڤا ھەولێرێ وەکی نیشانەیا “نیازپاکیێ”یا ھەرێما کوردستانێ تێ پێناسەکرن کو دخوازە ھەموو کێشەیان ل سەر بنگەھا دەستوورا ئیراقێ و ب رێیا دیالۆگەکە ئاشتییانە چارەسەر بکە.
