خەمیس خەنجەر: سەردانا مەسروور بارزانی بوویە پێنگاڤا چارەسەرکرنا گەلەک پرسگرێکان
سەرۆکێ ھەڤپەیمانیا سیادەیێ خەمیس خەنجەر راگھاند کو سەردانا سەرۆکێ حکوومەتا ھەرێما کوردستانێ مەسروور بارزانی بۆ بەغدایێ پر سەرکەفتی و گرنگ بوویە. خەنجەر ئەشکەرە کر کو ئەڤ لڤینا دیپلۆماتیک بوویە پێنگاڤا چارەسەرکرنا گەلەک ئارێشەیێن ناڤبەرا ھەولێر و بەغدایێ و دیار کر کو لھەڤکرنەکە سیاسی یا نوو بۆ دەستپێکرنا فەرمی یا ھناردەکرنا پەترۆلا ھەرێما کوردستانێ بۆ بەندەرا جەیھانێ یا ترکیەیێ پێک ھاتیە.
کەسایەتیێ سیاسییێ ناسکرییێ ئیراقێ خەمیس خەنجەر، ئیرۆ (یەکشەمێ، 24/5/2026ێ) ل مالا خوە پێشوازیا سەرۆکوەزیر مەسروور بارزانی کر. پشتی جڤینەکە دوئالی، خەنجەر د دەما برێخستنا مەسروور بارزانی دە ژ رۆژنامەڤانان رە ئاخڤی و بال کشاند سەر گرنگیا دەمێ و گۆت، “ئەڤ جڤین د دەمەکە پر ھەستیار دە ب رێ ڤە دچن، ب تایبەتی کو ئیراق ل پێشبەری پێنگاڤێن ئاڤاکرنا حکوومەتەکە نوو ب سەرۆکاتیا عەلی زەیدییە.”
خەنجەر دەستنیشان کر کو نھا دەرفەت و فەرسەندەکە زێرین ل پێشبەری تەڤاھیا ھێزێن سیاسی یێن ئیراقێیە داکو ھەمی ئارێشەیێن ھلاویستی ب ئاوایەکی بنگەھین چارەسەر بکن. وی تەکەز کر کو دڤێت رێبازەک وەرە گرتن کو رێ ل بەر دوبارە سەرھلدانا قەیرانان بگرە و ئارامیا سیاسی پیڤە بکە.
د بەردەوامیا ئاخافتنا خوە دە، سەرۆکێ ھەڤپەیمانیا سیادەیێ بال کشاند سەر ئالۆزیێن بۆری و باندۆرێن خرابێن ھەڤرکیێن د ناڤبەرا ئیران و ئامەریکایێ دەیێن ل سەر ئاخا ئیراقێ. خەنجەر ب توندی رەخنە ل ئێریشێن میلیشیایان یێن ل سەر ھەرێما کوردستانێ و وەلاتێن عەرەبی گرت و ھشیاری دا کو بەردەوامبوونا ڤان بنپێکرنان رەوشا ناڤخوەیی و یا دەڤەرێ بەر ب نەئارامیێ ڤە پال ددە و پەکھاتەیا جڤاکی یا ئیراقێ تێک ددە.
ل سەر بابەتا تەمامکرنا کابینەیا وەزاری یا نوو، خەمیس خەنجەر ئەشکەرە کر کو ئالیێن سیاسی گھیشتنە لھەڤکرنەکێ داکو راستەراست پشتی بێھنڤەدانا جەژنا قوربانێ، وەزیرێن نوو بۆ وان وەزارەتان بێن دیارکرن یێن کو ھەتا نھا ب وەکالەت تێن برێڤەبرن. خەنجەر دا زانین کو ژ بۆ دارێتنا کارنامەیا حکوومەتێ چەند جڤینێن دن د رێ دە نە.
خەمیس خەنجەر د داویێ دە تەکەز کر کو پێدڤیتیا وەلاتیێن ئیراقێ د ڤێ قۆناغێ دە ژ ھەر دەمێ زێدەتر ب ڤی ئاوایێ ھەڤفێمکرن و دیالۆگان ھەیە، داکو بەرژەوەندیێن بلند و ئەولەھیا وەلات ل ھەمبەری باگەرێن ھەرێمی وەرن پاراستن.
