کالکان ژ بۆ چارەسەریێ بانگ ل حکوومەتێ کر: “ئەگەر ھوون جدی بن ئەز دێ نەخشەرێیەکا زەلال پێشکێش کم”
ئەندامێ ئاکادەمیا زانستێن جڤاکی یا عەبدوللاھ ئۆجالان و یەک ژ دامەزرینەرێن پارتیا کارکەرێن کوردستانێ (پەکەکێ) دوران کالکان، تەڤلی بەرنامەیەکە تایبەتا کانالا “مەدیا خەبەرێ” بوو و ل سەر گەشەدانێن داوی یێن سیاسی، ھەڤدیتنێن ئیمرالیێ و نەخشەرێیا قۆناغا نوو نرخاندنێن گرینگ کرن. کالکان دەستنیشان کر کو دڤێت پێڤاژۆیێن ل ئیمرالیێ ب ئاوایەکی ڤەکری و زەلال ل بەر چاڤان بن و بانگ ل رایەدارێن حکوومەتێ کر کو گاڤێن شێنبەر باڤێژن.
کالکان ب بیر خست کو رایەدارێن دەولەتێ و پارتیا عەدالەت و گەشەپێدانێ (ئاکەپێ) ژ بۆ داویا مەھا نیسانێ سۆزێن دەرخستنا قانوونێن نوو دابوون، لێ بەلێ ھەتا نھا چ گاڤێن پراکتیکی نەھاتنە ئاڤێتن. کالکان دیار کر کو ئەگەر ئەنیا دەستھلاتێ د مژارا چارەسەریێ دە خوەدی نیەتەکا جدی بە، ئامادەیە نەخشەرێیەکە زەلال بخە دەورێ و گۆت: “دڤێت دەملدەست دەرباسی قۆناغا دویەمین ببن و یاسایێن سیاسەتا دەمۆکراتیک وەرن دەرخستن. د سەری دە ژ بۆ ئۆجالان، ژ بۆ کو ئەو بگھیژە شەرت و مەرجێن ئازادێن ژیان و خەباتێ، پێویستی ب ‘یاسایا ئازادیێ’ ھەیە.”
د بەردەوامیا ئاخافتنا خوە دە، کالکان بال کشاند سەر نێزیکاتیا خوەیا ستراتەژیک و دەستنیشان کر کو وەکی تەڤگەر، وان نە تەنێ بریارا راوەستاندنا شەرێ چەکداری دایە، لێ بەلێ ب تەمامی دەرباسی ستراتەژیا سیاسەتا دەمۆکراتیک بوونە. کالکان حکوومەت ب ھەولدانا “تاسفیەکرنێ” تۆھمەتبار کر و دەستنیشان کر کو سیاسەتا دەرڤە یا ئەنقەرەیێ ل سەر بنگەھا “رادەستبوون و شانتاژێ” دمەشە. وی ئیدیعیا کر کو دەستھلاتا ئاکەپێ د شەرێ جیھانێ یێ 3یەمین و پۆلیتیکایێن ھەرێمی دە، ھەول ددە ب بلۆکا ئامەریکا و ئیسرایلێ رە ل ھەڤ بکە و ئەڤ یەک وەکی حەسابەکی شاش پێناسە کر.
کالکان زەختێن دادگەهێ یێن ل سەر پارتیا گەل یا کۆماری (جەهەپێ) و ھەڤسەرۆکێ وێ ئۆزگور ئۆزەل ژی نرخاندن و ئەڤ رەوش یەکسەر ب پرسگرێکا کورد رە گرێدا. کالکان دیار کر کو ئیرۆ ئۆدەیێن دادگەھان وەکی ناڤەندێن پلانسازیا دەربەیان تێن بکارئانین و گۆت: “ئۆزگور ئۆزەل ژ بەر کو قالا مافێن گەلێ کورد دکە، ژ ئالیێ دەولەت باخچەلی و پەرگالێ ڤە تێ ھەدەفگرتن. دڤێت برێڤەبریا جەهەپێ ل ھەمبەری ڤان زەختان پاشڤەگاڤ نەهاڤێژە.”
د بەشا داوی یا داخویانیا خوە دە، کالکان رەخنەیێن ناڤخوەیی ژی ئانین زمان و بال کشاند سەر شێوازا چالاکیان یا دەمێن داوی. کالکان دیار کر کو د خەتا چالاکیان دە ھندەک دەژەنەراسیۆن و کێماسی پەیدا بوونە و چالاکیێن کو تەنێ ژ بۆ رووپەلا چاپەمەنیێ تێن کرن بێباندۆرن. کالکان ل سەر ڤێ بنگەھێ بانگ ل جوانێن وەلاتپارێز کر کو فەلسەفەیا ئۆجالان یا “دەما دکە دفکرە، دەما دفکرە دکە” ژ خوە رە بکن میناک و راگھاند کو ئەو وەکی تەڤگەر د پێڤاژۆیەکە رەخنەداینێ و سەرەراستکرنا پراکتیکا خوە دە نە.
