حەسەکێ: د چارچۆڤەیا لھەڤکرنا ب شامێ رە گرتیێن ھەسەدێ تێن بەردان
د چارچۆڤەیا پێنگاڤەکا نوویا جیبجیکرنا رێکەفتنا ناڤبەرا ھێزێن سووریەیا دەمۆکراتیک (ھەسەدێ) و شامێ دە، کاروانەکی گرتیێن ھەسەدێ یێن کو د دەستێ حکوومەتا ڤەگوھێز دە بوون، گھیشت باژارێ حەسەکێ و پرۆسەیا بەردانا وان دەست پێ کر. ئەڤ گاڤ وەکی ئەنجامەکە بەرچاڤا دیالۆگا د ناڤبەرا ھەر دو ئالیان دە تێ نرخاندن.
کاروانێ ناڤبۆری یێ کو ھەژمارەکە زێدەیا گرتیێن ھەسەدێ تێ دە جھ دگرت، گھیشت بارەگەھا فەوجا مەلبیەیێ یا ل گوندەوارێ باژارێ حەسەکێ. ھات راگھاندن کو ئەڤ گاڤ د چارچۆڤەیا پەیمانا فەرمی یا 29ێ چلەیا بۆری دە، یا کو د ناڤبەرا رێڤەبەریا خوەسەر و حکوومەتا ناڤەندی یا شامێ دە ھاتبوو ئیمزەکرن، تێ ئاڤێتن.
تێکلداری مژارێ، پارێزگارێ حەسەکێ نوورەدین ئەحمەد ل سەر حەسابا خوە یا تۆرا جڤاکی “X”ێ داخویانیەک بەلاڤ کر و لیستەیا فەرمی یا ناڤێن 88 گرتیێن کو بریارا ئازادکرنا وان ھاتیە دایین، ب رایا گشتی رە پارڤە کر. پارێزگار تەکەز کر کو ئەڤ پرۆسە دێ قۆناغ ب قۆناغ بەردەوام بکە.
ھاتە راگھاندن کو پرۆسەیا سەربەستبەردانێ د بن چاڤدێریا راستەراستا تیما سەرۆکاتیێ یا تایبەت دە برێڤە دچە. ئەڤ خەبات ب ھەڤاھەنگیەکە نێزیک د ناڤبەرا پارێزگارێ حەسەکێ نوورەدین ئەحمەد و فەرماندارێ ھێزێن ئەولەھیا ھوندرین (ئاساییش) مەروان عەلی دە تێ مەشاندن دا کو چ پرسگرێکێن ئەولەھیێ دەرنەکەڤن.
ل گۆری پلانسازیێ، بریارە کو کاروانێ گرتیان پشتی رێنڤیسێن ل فەوجا مەلبیەیێ، بەر ب باژارێ وەرزیشێیێ ل تاخا گووەرانێیا باژارێ ھەسەکێ ڤە بچە. ل وێ دەرێ، ب سەدان مالبات و وەلاتی ژ بۆ پێشوازیکرنا خزمێن خوەیێن ئازادکری جڤیانە و ل بەندا ھاتنا کاروانی نە.
پارێزگاریا ھەسەکێ بەریا نھا ژی داخویاندبوو کو ئازادکرنا گرتیان دێ د چەند قۆناخێن جودا دە بەردەوام بکە ھەتا کو ئەڤ دۆسیە ب تەمامی و ب داوی ببە. چاڤدێرێن سیاسی ڤێ گاڤا داوی وەکی نیشانەیەکە خورتا پێشکەتنا دیالۆگا سیاسییا ناڤبەرا رێڤەبەریا خوەسەر و شامێ دنرخینن.
