دەستپێشخەریيەکا هەستیار؛ چانسێ دوماهییێ یێ ئاشتیێ د ناڤبەرا ئەنقەرە و پەکەکێ دە
پارتیا دەمۆکراسی و وهكههڤییا گەلان دەم پارتیێ ئاشکەرە کر کو وان دەستپێشخەریەکە نوو دەستپێکریە ب مەرەما لڤاندن و بلەزکرنا پێڤاژۆیا ئاشتیێ یا ئاستەنگبوویی د نێڤبەرا ئەنقەرە و پهكهكێ دە. ئەڤ دەستپێشخەری ئارمانج دکە کو پێڤاژۆیێ د مەھەک و نیڤان دە بگەھینە قۆناغەکە ئیکلاکەر.
پێڤاژۆیا ئاشتیێ یا كو د بنگەھ دە د چریا یەکێ یا سالا 2024ێ دە دەستپێکربوو، لێ نھا گەھشتیە قۆناغەکە ئاسێ و ب سەدەما دەرنەکەفتنا رێسایێن یاسایی ئاستەنگبوویە. ئاكهپه دبێژە کو چەکدانینا ب تەمامی و راستین مەرجێ ئاڤێتنا گاڤێن قانوونی یە، پهكهكه ژی ل لایێ خوە دبێژە کو ترکیەیێ پێڤاژۆ جەمداندی یە.
دەم پارتی، کو وەسا خویا دکە رۆلا ناڤبەینکار د نێڤبەرا ئەنقەرە و ئۆجالانی دە دگێره، راگەھاند کو ئەو مژوولی ئامادەکرنا رەشنڤیسا یاسایەکێ نە بۆ پارلامەنتۆیا ترکیەیێ داکو ئەڤ پێڤاژۆیا كو ژ مەھا سباتا ئیسال 2026ێ ڤه ئاستەنگبوویی، وهره لڤاندن و بلەزکرن.
پێڤاژۆ د مهههك و نیڤان ده دێ گههیته قۆناغهكا یهكلاكهر
د ڤێ دەبارێ دە، ھەڤسەرۆکا دەم پارتیێ “پەروین بولدان” د داخویانیەکە رۆژنامەڤانی دە د دەمێ بێھنڤەدانا جەژنێ دە دیار کر کو پرۆژەیاسایەکە نوو کو ژ 7 تا 8 ماددەیان پێک تێ، دێ بكهڤه د بەرنامەیێ کار یێ پارلامەنتۆیێ دە.
وێ گۆت: “ئەو ئەندامێن پهكهكێ یێن د دەمەکێ دیارکری دە چەکێ خوە دادنن، دێ ژ ڤێ یاسایێ مفادار بن. یاسا دێ مافێ ئازادییا تام دەتە وان کو ڤەگەرن ناڤ جڤاکا خوە ل ترکیەیێ، یان بچنە ھەر دەرەکە دنیایێ کو ئەو ژێ حەز دکەن.”
بولدانێ ئاماژە ب ھەڤدیتنا داوین یا دگەل ئۆجالان کر و گۆت کو ئۆجالان دوپاتی ل سەر بەردەوامبوونا پێڤاژۆیا ئاشتیێ و دەربازکرنا ھەمی ئاستەنگیان کریە.
دەم پارتی ژ بۆ كو کو ڤێ دەستپێشخەریێ ب ئەنجام بگەھینە، کەفتیە د ناڤ لێگەر و ھەولان دە داکو د دەما مهههك و نیڤان دە ڤێ پرۆژهیاسایێ ل پارلامەنتۆیێ دەرباز بکە؛ چونکه ئەڤە ئەو دەمێ کێمە یێ كو د دەستێ پارلامەنتۆیێ دە مایه بەری کو بکەڤە د بێھنڤەدانا وەرزی یا ھاڤینێ دە، کو زێدەتر ژ دو مههان دکێشت.
ل گۆری گۆتنا پەروین بولدانێ، گیرۆکرنا پێڤاژۆیێ نەرازیبوونا توند یا پهكهكێ ل پهی خوه دئینه، ئەڤ چەندە ژی دبه خهتهری ل سەر ھلوەشاندنا پێڤاژۆیێ ب گشتی.
ئەڤ ئاخافتنێن بولدانێ، ئۆفیس و ناڤەندێن سیاسی یێن ترکیەیێ خستنە د حالەتێ چاڤەرێبوونێ دە، دا کو بزانن ھەلوەستێ ھەڤپەیمانیا دەستهەلاتدار (ئاكهپێ و مهههپێ) دێ چ بیت.
مەرجێن ئەنقەرێ و پهكهكێ
پارتیا داد و گەشەپێدانێ (ئاكهپێ) یا دەستههلاتدار و ھەڤپەیمانێ وێ یێ نەتەوەپەرست (مهههپێ) ل دژی گۆتوبێژكرنا ڤێ رەشنڤیسێ نینن، بەلێ تاقیکرنا راستەقین د ھەفتهیا پێش مه دە دەستپێدکە. تێ چاڤەرێکرن سەرۆکێ مهههپێ “دەولەت باھچەلی” پشتەڤانیێ ل دەستپێکرنا نیقاشێن یاسایی بکە، لێ مەرجێ ئاكهپێ دوپاتكرنه ل سەر پشتراستبوونا تام ژ دانانا چەکان.
حکوومەتا ترکیەیێ مەرج داناینە کو وەزارەتێن بەرەڤانی و ناڤخۆ، دگەل دەزگەھێ ئیستخباراتێ (میتێ)، راپۆرەکە فەرمی پێشکێش بکەن کو تێدا وهره پشتراستکرن کو پهكهكێ و رێخستنێن وێ ل ههرێمێ ب تەمامی دەست ژ چەکی بەردانە و چ خهتهریهكا ئەمنی نەمایە.
ل بەرامبەر دا، رێبهرێن پهكهكێ (کو بنگەھێن وان ل دەوەرێن چیایی یێن ھەرێما کوردستانێ نە ل نێزی سێگۆشەیا سینۆری یا ئیراق-ترکیە- ئیران) دبێژن کو دانانا چارچۆڤەیەکا یاسایی بەری ھەر تشتەکی، مسۆگەری و گارانتییە ژ بۆ وان کەسێن چەکی دادنن، دا کو داھاتی و چارەنڤیسێ وان وهره پاراستن.
