گهلۆ ترێنا ژ رێ دهركهتی یا چارهسهریێ دێ بگههه وهستگهها خوه یا داوی؟!
ئەندامێ پارتیا وەکھەڤی و دەمۆکراسیێیا گەلان (دهم پارتی) یێ ژ بۆ ئیمرالیێ، میدحەت سانجار دیار کر کو پێڤاژۆیا ئاشتیێ هێدی بوویە لێ ژ رێ دەرنەکەفتییە. وی گۆت کو عهبدوللا ئۆجالان نەخشەرێیەکا سێ خالی پێشکێش کر، کو وی وەک “خالێن بنەرەتی” ب ناڤ کرن، کو ئارمانجا وێ چاککرن و نووژەنکرنە، و داخواز کر کو بەری پەرلەمان بکەڤیتە بێهنڤەدانێ، رێكارێن قانوونی یێن کریتیک بلهز بهێنە بجهئینان.
میدحەت سانجار د دەربارێ جڤینا وان یا داویێ و پێڤاژۆیا کو حکومەت ژێ را دبێژیت “تورکیایا بێ تەرۆر” داخویانیێن گرنگ دان.
سانجار، ب بکارئینانا ئانالۆژییا ترێن بۆ وەسفکرنا پێشڤەچوونا پێڤاژۆیا چارەسەریێ گۆت: “ترێن ژ رێ دەرنەکەفتییە، لێ گەلەک هێدی ببوو. ئەم دشێین بێژین کو ئەوێ ئێدی دیسا دەست ب لڤینێ کرییە و مە قۆناغا بێچالاکیێ دەرباز کرییە.”
سانجار تهكهز کر کو رێبەرێ پەکەکێ عهبدوللا ئۆجالان نەخشەرێیەک کو ژ سێ خالێن بنەرەتی پێکدهێت پێشکێش کریە داکو ئاستەنگیێن د پێڤاژۆیێ دە دەرباز بکەت، و دوپات کر کو دڤێت رێسایێن قانوونی بەری کو پەرلەمان بکەڤیتە بێهنڤەدانێ ب زوویی بهێنە پەسەندکرن.
نەخشەرێیا ئۆجالان
سانجار چوارچۆڤەیێ پێشنیارێن ئۆجالانی د بن ڤان سێ خالێن سهرهكی دا کورت کرن:
جەوهەرێ قانوونێ (قانوونا خانەیا بنەرەتی): ئۆجالان قانوونا چوارچۆڤەیی یا چاڤەرێکری وهك “خانەیا بنەرەتی” د ههژمێریت. دڤێت ئەڤێ قانوونێ ئارمانجێن سەرەکی هەبن: چاککرنا وێ زیانا کو ژ بەر شهری (ڤەگوهاستنا ژ توندوتیژیێ بۆ سیاسەتێ) چێبووی، و نووژەنکرنا رهوشێ ب ئاڤاکرنا جڤاکەکا دهمۆكراتیك بهێته كرن. دڤێت ئەڤ قانوونە بۆ پێڤاژۆیێن چەکدانان و ئینتیگراسیۆنێ گارانتیێن قانوونی دابین بکەت.
سازكرنا پێڤاژۆیێ: ژ بۆ کو دانوستاندن ل سەر بنەمایەکێ بهێز و باوەرپێکری، سەربەخۆ، بەردەوام بن، پێدڤییە میکانیزمەکا قانوونی بهێته پێش. ئەو قانوونا کو دێ هێتە دەرخستن، و ئەو میکانیزم و دەستەیێن کو دێ هێنە دامەزراندن، دڤێت بنەمایەکێ وان یێ قانوونی ژی هەبیت.
دیارکرنا رۆلێ ئۆجالانی: دهێته خواستن کو جهـ و رۆلێ وی د ناڤ پێڤاژۆیێ دە د چوارچۆڤەکێ قانوونی و سیاسی دە ب زەلالی بهێتە دەستنیشانکرن.
“دڤێت دەم نەهێتە ونداکرن، دڤێت قانوون بەری پەرلەمان بکەڤیتە بێهنڤەدانێ بهێتە دەرخستن”
سانجار دیار کر کو گیرۆكرن مەترسییێن جدی ل دووڤ خوه دئینیت و گۆت: “ئۆجالان پێداگریێ دکەت کو قۆناغا رێسایا قانوونی نەهێتە پاشخستن. ئارمانج و مەبەسەتا مە ئەوە کو ئەڤ قانوونا چوارچۆڤە ب لێکهاتنەکا هەرە بەرفرههـ بەری کو پەرلەمان بکەڤیتە د ناڤ بێهنڤەدانێ دا بهێتە دەرخستن.”
سانجار، ئەندامێ شاندا ئیمرالیێ، زێدە کر کو وەک پارتییا دهمێ، ئەو ئامادەکارییێن خۆ یێن ل سهر رهشنڤیسێن قانوونی ل گۆر سیناریۆ و پێشنیارێن جودا ب بەردەوامی نوو دکەنەڤە.
سانجار ئەو ئیدیعایێن هەڤدژ و دژبەرییێ یێن د ناڤ ئاكهپێ دە د دەربارێ پێڤاژۆیێ دە نرخاندن و دیار کر کو ئەو ل هەمبەر گۆتۆبێژێن وەسا هوشیارن، و هەرچەندە نێرینێن جودا هەبن ژی، یا گرنگ ئەوە کو پێڤاژۆ د بن مەنتقەک و ئارمانجەکا هەڤپشک دە بهێتە برێڤهبرن.
