سەرۆک بارزانی: کۆمکوژیا زێوه نەکاری ئیرادەیا گەلێ کوردستانێ بشکینە
سەرۆک مەسعوود بارزانی د سالڤهگهرا 41ێ یا بۆمبەبارانکرنا کامپا زێوه دە پەیامەک وەشاند و راگھاند، کارەساتا زێوه رووپەلەکە دن یا ب خوینە د کارنامەیا رەشا رەژیما بەرێ یا ئیراقێ دە.
سەرۆک بارزانی ئیرۆ 9ێ خزیرانا 2026ێ د پەیاما خوە دە بال کشاند سەر تاوانکاریا رەژیما بەرێ یا ئیراقێ کو د 9ێ خزیرانا 1985ێ دە ب فرۆکەیێن شەر کامپا پەنابەران یا زێوه یا ل رۆژھلاتێ کوردستانێ ب ئاوایەکی ھۆڤ بۆمبەباران کربوو.
پەیاما سەرۆک بارزانی:
ب ناڤێ خوەدایێ مەزن و دلۆڤان
د 9ێ خزیرانا 1985ێ دە، رەژیما بەرێ یا ئیراقێ تاوانکاریەکە مەزن ل دژی گەلێ کوردستانێ پێک ئانی. د وێ رۆژێ دە، فرۆکەیێن رەژیمێ ب شێوەیەکی ھۆڤ کامپا پەنابەران یا زێوه یا ل رۆژھلاتێ کوردستانێ بۆمبەباران کر و د ئەنجاما وێ ئێریشا نەمرۆڤانە دە، ب سەدان ژن، زارۆک، کال، پیر و جوانێن بێگونەھ شەھید و بریندار بوون.
کارەساتا زێوه رووپەلەکە دن یا ب خوینە د کارنامەیا رەشا رەژیما بەرێ یا ئیراقێ دە. ئەو رۆژ یەک ژ رۆژێن ھەری خەمگینێن ژیانا من بوو. نالین و شینا دایکان و لاشێن شەوتی و پارچەکری یێن شەھید و بریندارێن زێوه، دل و دەروونا ھەر خوەدیوژدانەکی دھەژاند.
ئارمانجا رەژیمێ ژ تاوانکاریا کۆمکوژیا زێوه و تاوانێن دن، شکاندنا ئیرادەیا پەنابەر، پێشمەرگە و خەباتکارێن کوردستانێ بوو. لێ وان تاوانان ئیرادەیا پێشمەرگە و کورێن گەلێ کوردستانێ ژ بۆ بەردەوامکرنا خەباتا ل دژی ستەمکار و دەستھلاتدارێن وێ دەمێ یێن ئیراقێ بریاردارتر و بھێزتر کر. د ئەنجاما وێ قوربانیدان، تێکۆشین و خەباتێ دە، چارەنڤیسا زالم و تاوانباران سەرشۆری و شکەستن بوو و سەربلندی و سەرکەفتن ژی ژ بۆ گەلێ کوردستانێ ما.
د 41مین سالڤەگەرا کارەساتا زێوه دە، ئەم سلاڤێ ژ بۆ گیانێ پاکێ شەھیدێن زێوه و ھەموو شەھیدێن رێیا ئازادیا کوردستانێ دشینن.
