مەسروور بارزانی ل سەر پێکانینا حکوومەتێ داخویانی دا

سەرۆکوەزیرێ ھەرێما کوردستانێ مەسروور بارزانی راگھاند کو ژ بۆ پێکانینا کابینەیا نوو یا ھەرێما کوردستانێ دڤێ ئەولی پارلامەنتۆیا کوردستانێ وەرە ئاکتیڤکرن.

مەسروور بارزانی تەکەز کر کو پارلامەنتۆ ملکێ گەلە و نابە ت کەس رێ ل بەر ئاکتیڤکرنا وێ بگرە.

سەرۆکوەزیرێ ھەرێما کوردستانێ مەسروور بارزانی ئیرۆ ل ھەولێرێ نوونەرێ تایبەتێ سەرۆکێ ئامەریکایێ یێ سووریە و ئیراقێ تۆم باڕاک پێشوازی کر.

پشتی جڤینێ، مەسروور بارزانی ل سەر ناڤەرۆکا ھەڤدیتنێ و مژارێن رۆژەڤێ ئاگاھی دان.

ھەڤاھەنگیا ب بەغدایێ رە و ھلبەرینا ئامەریکایێ

مەسروور بارزانی جڤین وەکی “پر باش” پێناسە کر.

مەسروور بارزانی دیار کر کو وان ل سەر ھەموو مژارێن گرینگێن ھەرێما کوردستانێ و ئیراقێ گۆتووبێژ کریە و گۆت:

“مە قالا ئاوایێ ھەڤاھەنگی و خەباتا ب حکوومەتا برێز عەلی زەیدی رە کر دا کو رەوشا ئابۆری و ئەولەھیێیا ناڤچەیێ باشتر ببە.”

ھەر وھا وی دا زانین کو د جڤینێ دە مژارا زێدەکرنا ھلبەرینا شرکەتێن ئامەریکی یا ل ھەرێما کوردستانێ ھاتیە نرخاندن.

مەسروور بارزانی ئانی زمێن کو ئەڤ گاڤ دێ ببە ئالیکار دا کو ئابۆریا ئیراقێ ژی بھێزتر ببە.

ئاکتیڤکرنا پارلامەنتۆیا کوردستانێ

مەسروور بارزانی ل سەر پرسا پێکانینا کابینەیا نوویا ھەرێما کوردستانێ بال کشاند سەر گرینگیا سازیا یاسادانینێ و گۆت:

“گاڤا یەکەما پێکانینا حکوومەتێ، ئاکتیڤکرنا پارلامەنتۆیێ یە. ھەتا نھا پارلامەنتۆ نەھاتیە ئاکتیڤکرن و ئەڤ یەک نە د جھێ خوە دەیە.”

بارزانی رەخنەیێن خوە دۆماندن و وھا پێ دە چوو:

“مە ژ رۆژا یەکەم ڤە گۆتیە کو پارلامەنتۆ ملکێ ھەموو گەلێ ھەرێما کوردستانێیە و نە ملکێ ت پارتیەکە سیاسییە.

مافێ ت کەسی نینە کو رێ ل بەر ئاکتیڤکرنا پارلامەنتۆیێ بگرە.”

مەسروور بارزانی ھەر وھا ئانی زمێن کو پارلامەنتۆ جھێ نیقاشکرنا نێرینێن جودایە و گۆت:

“ھەکە پارلامەنتۆ وەرە ئاکتیڤکرن، وێ دەمێ ئەم دکارن ل سەر پێکانینا حکوومەتێ ژی باخڤن.”

پەیمانا ئامەریکا و ئیرانێ

سەرۆکوەزیرێ ھەرێما کوردستانێ ھەلوەستا ھەولێرێیا ل سەر پەیمانا نوویا د ناڤبەرا واشنگتۆن و تەھرانێ دە ژی زەلال کر و گۆت:

“ئەم ھەر دەم ب ئالیێ ئاشتیێ رە نە. ئەم ھەر پەیمانێ پێشوازی دکن کو ھەرێمێ بەر ب ئاشتی و ئارامیێ ڤە ببە.”