جوانێن شۆرەشگەر كهچهكا 14 سالی ژ گوندەکێ عەفرینێ رەڤاند
ل گوندێ باسووتێ یێ سەر ب ھەرێما عهفرینێ ڤە، زارۆکا ب ناڤێ “حەیات خەلیل وەلۆ” یا 14 سالی ژ ئالیێ كۆما چهتهیێن پهكهكێ یا ب “جوانێن شۆرەشگەر” ھات رەڤاندن و بەر ب قامشلۆیێ ڤە ھات برن.
رێخستنا مافێن مرۆڤان ل عهفرینێ راگھاند، کۆمەکە رووپێچاندی یا سەر ب “جوانێن شۆرەشگەر” ڤە کو ژ 5 کەسان پێک، دھات بەربانگا 4ێ خزیرانا 2026ان، ب سەر گوندێ باسووتێ دە گرتن و زارۆکا 14 سالی یا ب ناڤێ “حهیات خەلیل وەلۆ” رەڤاندنە و ئەو بەر ب باژارێ قامشلۆیێ ڤە برنە.
پشتی روودانا بوویەرێ، رایەدارێن ھەرێمی دەست ب لێکۆلینێن بەرفرەھ کرنە، دا کو جھێ زارۆکێ دیار بکن و وێ ب سلامەتی رادەستی مالباتا وێ بکن.
ل گۆری وێ رێخستنێ، ئەڤ بوویەر د چارچۆڤەیا بنپێکرنێن بەردەوامێن ل دژی زارۆکێن کورد ل رۆژئاڤایێ کوردستانێ دە تێ ھەژمارتن. ھەر وھا بانگ ل وەلاتیان ھات کرن کو ل ھەمبەری تەڤگەرێن ڤان کۆمێن کو زارۆکان درەڤینن ھشیار بن.
مالباتا “حەیات خەلیل وەلۆ” و رێخستنێن مافێن مرۆڤان داخواز دکن کو حەیات دەملدەست بێ ئازادکرن و ڤەگەراندن بۆ ناڤ مالباتا خوە.
تەڤگەرا جوانێن شۆرەشگەر کو سەر ب رێڤەبەریا خوەسەر و ههسهدێ ڤە تێ ھەژمارتن، ب وێ یەکێ تێ تاوانبارکرن کو ب مەبەستا لەشکەرکرنێ، جوان و زارۆکان ل ھەرێمێن جودایێن رۆژئاڤایێ کوردستانێ درەڤینە.
تەڤی کو ھێزێن سووریەیا دەمۆکراتیک (ههسهدێ) د خزیرانا 2019ان دە ب نەتەوەیێن یەکگرتی رە پلانەکە چالاکیێ ژ بۆ قەدەغەکرنا تەڤلیکرنا زارۆکان د ناڤا رەفێن چەکدار دە ئیمزە کربوو، لێ رەڤاندنا زارۆکان ھین ژی بەردەوام دکە.
