پهرلهمانێ ترکیەیێ ژ بەر پێڤاژۆیا ئاشتیێ وهرزێ یاسادانانێ درێژ كر
پهرلهمانێ ترکیەیێ بریار دا کو خەباتێن خوەیێن یاسایی درێژ بکە و د 1ێ تیرمەھێ دە نەچە بێهنڤهدانا سالانه. دەم پارتی ژی ھەولێن خوە زێدە کرنە داکو بەری بێهنڤهدانێ، چارچۆڤەیەکە یاسایی ژ بۆ پێڤاژۆیا ئاشتیێ وەرە ئامادەکرن.
بریارا درێژکرنا دەما خەباتێن پهرلهمانێ ترکیەیێ د رۆژنامەیا فەرمی یا وی وەلاتی دە ھات وەشاندن. ل گۆری بریارێ، پهرلهمانێ کو دھات چاڤەرێکرن د 1ێ تیرمەھا 2026ان دە بکەڤە د بهێنڤهدانێ ده، دێ خەباتێن خوە بەردەوام بکە.
ئەڤ بریارا کو ل سەر بنگەھا مادەیا 93 یا دەستوورێ و مادەیا 5 یا رێزکنامەیا ناڤخوەیا پارلامەنتۆیێ ھاتیە گرتن، د جڤینا 102 یا جڤاتا گشتی دە یا د 16 خزیرانێ دە ھاتبوو پەسەندکرن.
ھەڤدەم لگەل درێژکرنا خەباتێن پارلامەنتۆیێ، دەم پارتی ژی داخواز دکە کو ئەڤ دەرفەت ژ بۆ ئاڤێتنا پێنگاڤێن پراتیکی یێن دەربارێ پێڤاژۆیا ئاشتیێ دە وەرە بکارئانین. نوونەرێن کورد دەستنیشان دکن کو دڤێ بەری بێهنڤهدانا ھاڤینێ، بنگەھێن یاسایی ژ بۆ دەستپێکرنا پێڤاژۆیا چارەسەریێ بێن دانین.
ھەڤدیتنا ب سەرۆکێ مەجلیسێ رە
د ڤێ چارچۆڤەیێ دە، شاندەیا ئیمرالیێ ب سەرۆکێ مەجلیسا ترکیەیێ رە جڤیا. د ھەڤدیتنێ دە، شاندەیێ ب ھوورگولی بەحسا گرنگیا رۆلا پارلامەنتۆیێ د چارەسەرکرنا پرسا کورد دە کر. شاندەیێ تەکەزی ل سەر وێ یەکێ کر کو دڤێ “گاڤێن یاسایی” بێن ئاڤێتن داکو پێڤاژۆیا ئاشتیێ ببە خوەدی چارچۆڤەیەکە فەرمی و رێ ل بەر ئاستەنگیان وەرە گرتن.
تێ پایین کو د رۆژێن پێش دە، نیقاشێن ل سەر “یاسایا چارچۆڤە” ل پارلامەنتۆیێ گەرمتر ببن و ئالیێن سیاسی ل سەر نەخشەرێیەکە نوویا چارەسەریێ وەرن جەم ھەڤ.
