پەکەکێ گەف ل لێکۆلینەر گولستان یارکن و مالباتا وێ کرن
هاتە زانین ژ بەر نێرینێن خوەیێن کو ل سەر مەدیایا جڤاکی پارڤە کرنە گەف ل جڤاکناس و لێکۆلینەر گولستان یارکن هاتینە کرن.
یارکن دوھ ل سەر رووپەلا خوەیا Xێ راگھاند کو ئەو و مالباتا وێ رووبروویی گەفان هاتنە. بەلگەیێن کو ژ ئالیێ یارکن ڤە ھاتنە پارڤەکرن، ب زەلالی سەدەمێن ڤان گەفان دیار دکن؛ گەفێن کو د سەر ھەژمارێن (رەقەمێن) ئیراق، ئەندۆنزیا و ھتد ژ بۆ وێ ھاتنە شاندن.
ل گۆری ڤان بەلگەیان، د پەیامێن کو ژ بۆ دایکا وێ ھاتنە شاندن دە وەھا ھاتیە گۆتن: “پێشنیارا مە ئەوە کو تو کەچا خوە تەربیەت بکی. کەچا تە ل سەر تەڤگەرا مە ب ئاوایەکی نەباش دئاخڤیت. تەڤگەرا مە نەیا بێ خودانە.” د پەیامێن کو ژ بۆ خوشکا وێ ھاتنە شاندن دە ژی وەھا ھاتیە گۆتن: “خوشکا تە ب گۆتنێن نەباش یێن ل سەر تەڤگەرا مە، ژیانا خوە دئێخیتە مەترسیێ.” د وان پەیامێن کو تێ دە گەف ل گولیستانێ تێن کرن و ئیدیعا دکن کو سڤکاتی ل شەھیدان و ئۆجالان ھاتیە کرن، کەسێن گەفان دکن خوە وەکی “فەداییێن رێبەر ئاپۆ” پێناسە دکن. وەکی دن، ئاگاھیێن تایبەت (شەخسی)یێن یارکن و مالباتا وێ ژی ھاتنە بەلاڤکرن.
گولستان یارکن د داخویانیەکێ دە دەربارێ ڤان گەفان وەھا گۆت: “ئەڤ کەسە د پەیامێن خوەیێن ب گەف دە ئیدیعایێ دکن کو من سڤکاتی ل ‘ئاپۆ، پەکەکێ و شەھیدان’ کریە. چو دەلیلەک ژی نایێ پێشکێشکرن کو ڤێ ئیدیعایا وان پشتراست بکە. گەر مەسەلە ل سەر دەربڕینا هزرێن من بت، ئەڤە فاشیزم و دیکتاتۆرییە. ئەز ڤێ مژارێ تینم بەر چاڤێ رایا گشتی.” ب ڤی ئاوایی، وێ بانگ ل رایا گشتی کر کو ل دژی ڤان کریاران ھشیار بن.
یارکن، کو د قادا گشتی دە ب لێکۆلینێن خوە یێن سەربخوە تێ ناسکرن، عەلەوییە و ب گشتی ب پشتگریا خوە یا ژ بۆ تێکۆشینا ژنان دهێتە ناسکرن. د دەمێن داوی دە، یارکن ب رەخنەکرنا پۆلیتیکایێن “ئەنتەگراسیۆنێ”یێن ئۆجالان دھات ناسکرن. وێ رەخنەیێن خوە ب بەلگەیێن سیاسی و بێی کو بێرێزیێ بکە ئانیبوون زمان. گەفێن ل دژی یارکن، بوونە سەدەما کارڤەدانێن مەزن د ناڤا رایا گشتی یا کورد دە.
یارکن نە کەسا یەکەم یا سەربخوەیە کو ژ لایێ لایەنگرێن پەکەکێ ڤە دهێتە تەھدیدکرن. ھەموو نڤیسکار، رەوشەنبیر و سیاسەتمەدارێن کو ل دژی سیاسەتا ئەنتەگراسیۆنێ یا ئۆجالان یا سالا 2025ێ دەردکەڤن، ب ئاوایەکێ ھاتنە تەھدیدکرن. بەری دەمەکێ، ل سەر مەدیایا جڤاکی لیستەیا ناڤێن ھندەک کەسان کو وەکی ئارمانج ھاتبوون نیشاندان، ھاتبوو بەلاڤکرن.
دهێتە دیتن کو پەکەکە ژ بۆ رێگریکرنا ل رەخنە و پرسیارێن ل سەر ئۆجالان و پەکەکێ یێن د ناڤا گەلێ کورد دە کار دکەت، داکو ب رێیا بێدەنگکرنا رەخنەگران رێ ل بەر بەلاڤبوونا ڤێ ھەلوەستێ بگرە. ھەروھا دهێتە دیتن کو پەکەکە ھەلوەستەکا ئێریشکار، ب تایبەتی ل ھەمبەری وان کەسێن کو رەخنەیێن خوە ل سەر بەلگەیێن سیاسی و رەوا ئاڤا دکن، زێدەتر دکە.
