راپۆرتا ئیستیخباراتی یا گرینگ: پەکەکە ژ 72 خالان ڤەکشیا و ئارتێشا ترک ل وان جیھان ب جیھ بوو
د دەمەکێ دە کو نیقاشێن ل سەر “ئاسێبوونا” پرۆسەیا چارەسەریێ و دانینا چەکان بەردەوام دکن، راپۆرا نوویا سازیێن ئیستیخباراتی بالێ دکشینە سەر گوھەرتنەکا مەزنا لەشکەری. ل گۆری زانیاریێن ھاتنە وەشاندن، ھێزێن پارتیا کارکەرێن کوردستانێ (پەکەکێ) ژ 72 خالێن ستراتەژیکێن ل ناڤ ئاخا ھەرێما کوردستانێ ڤەکشیانە و ئارتێشا ترک راستەخوە ل وان جیھان ب جیھ بوویە.
ل گۆری نووچەیا رۆژنامەیا “نەفەس”ێ، پەکەکە ژ ھەرێمێن ھەری گرینگ یێن ل سەر سینۆرێ باشوور و باکورێ کوردستانێ پاشڤەکشاندن ئەنجام دایە. د ڤێ چارچۆڤەیێ دە، گەریلایان ھەرێمێن مینا گەلیێ مەتینایێ یێ ل ھەمبەری چەلێ یا جۆلەمێرگێ، کاشورا، دەرار، ھیرۆر، کێشتە، بێشیلی، زەندورا، سەرارۆ، بێگۆڤا، گرێ دلبەر، نێروەھ، رێکان، گەلیێ دۆستکی، گرێ مامرەش، زنجیرەچیایێن مەتینا، نھێل، چیایێ کوراژارۆ، چیایێ گاپنیرک، دەرگەلێ، میسکا، گۆلکا، بازێ، سپیندارێ، بەلاڤێ، زەنگل تەپە، ھەفتەنین، شەرانش، ئامێدی، شێلادزێ، کانیماسی، دێرەلووک و ئاڤاشین-باسیانێ ب تەمامی ڤالا کرنە کو ب گشتی 28 ھەرێمان ل خوە دگرە.
ھەروھا د راپۆرێ دە ھاتیە پشتراستکرن کو پەکەکێ ئەو ھەرێمێن کو بەرێ وەکی “فەرمانداریا ناڤەندی یا بریارگەھا پاراستنا گەل’ و “ھەرێمێن پاراستنا مەدیایێ” ب کار تینان ژی ب جیھ ھشتنە. د ناڤ ڤان جیھان دە خالێن ھەری ئاسێ یێن ل سەر چیایێ گارایێ مینا مەیرۆکێ، چەمرەبۆتکی، کانیا سار، بەرگارە، پیرز، سیانێ، گەلیێ کافیا، ئێکمالێ، نەھلی، گوزێ، مەلکێ، دۆستەکا، گیسێ، مەزرنگانە، ناڤخۆش، دیفری، دوڤریێ، قولنگەھ، مامیشمش، چەلکا، سەدارێ، گەلیێ ئۆھران، ئەرگەنێ، دەریێ چەندی، گرێ رەشیت، بیێ، نەران، شکەفتیان، بلندباز، کەلەھا سەددام، خەرێ، سەرگەلێ، کانی مازێ، چەمانکێ، شیلیا، کارەبا، رەبەتکێ، ھەسنەکێ، کانیکا، بەرواری بالا، گرێ بھار و دەڤەرا چەمچۆیا ل ھوندرێ گەلیێ زاپێ ھەنە. ھات راگھاندن کو ئەڤ دەڤەر ژ چەک و تەقەمەنیان ھاتنە پاقژکرن و سەربازێن ترک یێن کو د ئۆپەراسیۆنێن “پەنچە-کلید”ێ دە جیھ دگرن ل ور ھاتنە بجیهکرن.
ل ئالیێ دن، ئەڤ گەشەدان وەکی پەڤگوھەرتنەکا ڤەشارتی یا ناڤبەرا پەکەکێ و دەولەتا ترک تێ نرخاندن. مالپەرا “دارکا مازی” ژی بەریا نھا د راپۆرا خوەیا 28ێ تیرمەھا 2025ێ دە ب سەرناڤێ “پەکەکێ ھندەک چەپەر و چەکێن خوە ب دزی رادەستی ئارتێشا ترک دکە” داخویاندبوو کو تونەلێن ل دەردۆرا مەتینا و زاپێ ھاتنە رادەستکرن. ژ سالا 2019ێ ڤە، د ئەنجاما زنجیرە-ئۆپەراسیۆنێن “پەنچە”یێن ئارتێشا ترک دە، چیایێن ھەری گرینگ یێن ھەرێما کوردستانێ کەتنە بن کۆنترۆلا ئەنقەرەیێ. تێ زانین کو پەکەکێ بانگاوازیێن حکوومەتا ھەرێما کوردستانێ و ھێزێن پێشمەرگەیێن ب شێوازێ “ڤان لووتکەیان رادەستی مە بکن داکو خەلک زرارێ نەبینە و ئارتێشا ترک نەیێ ھەرێمێ” رەد کربوون، لێ پشترە ئەو لووتکە ھەموو تەسلیمی دەستێ ھێزێن ترک کرن.
